Petropavlda 3 myńnan astam adam alǵash ret daýys beredi
Petropavl turǵyny Aısulý Ámrına saılaýǵa alǵash ret qatysyp otyr. Ol - Manash Qozybaev atyndaǵy Soltústik Qazaqstan ýnıversıtetiniń 1-kýrs stýdenti. Mańyzdy is-sharada durys tańdaý jasaý úshin 18 jastaǵy boıjetken ár partııanyń saılaýaldy baǵdarlamasymen tanysyp shyǵypty.
«Alǵash ret daýys beretin bolǵandyqtan qobaljý boldy. Óıtkeni ár adamnyń daýysy mańyzdy, durys tańdaý jasaýǵa mindettimiz. Búgin birge oqıtyn qurby, qurdastarym da mańyzdy naýqanǵa qatysady. Elimiz damyp, órkendeı bersin degen tilegim bar», - deıdi Aısulý Ámrına.
Jalpy Petropavl qalasy boıynsha 165 myńǵa jýyq saılaýshy bar. Olardyń 3075-i alǵash ret saıası naýqanǵa qatysyp, óz tańdaýlaryn jasaıdy. Petropavl qalasy ákimi baspasóz qyzmetiniń málimetinshe, birinshi ret daýys berýshilerge azǵantaı estelik syılyq bar - qalam men bloknot tartý etilmek.