Petropavlda 3 balany baltamen jaraqattaǵan oqýshy aqyl-esi durys dep tanyldy

<p>Petropavlda bıyl aqpan aıynda mektepke balta ala baryp, synyptastaryna shabýyldaǵan 9-synyp oqýshysynyń aqyl-esi durys dep tanyldy. Bul jaıynda Soltústik Qazaqstan oblystyq Polıtsııa departamentiniń bastyǵy Aıdyn Qabduldınov brıfıng barysynda aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat tilshisi.</a></p>

Esterińizge salaıyq, oqıǵa Petropavldaǵy 4-shi mektepte 13 aqpan kúni boldy. 9-synyp oqýshysy mektepke ózimen birge balta ala baryp, synyptastaryn jaraqattady. Saldarynan úsh bala aýrýhanaǵa tústi. Al kúdikti oqýshy birden qamaýǵa alyndy.

Jasóspirimniń aqyl-esiniń durystyǵyn anyqtaý úshin onymen mamandar jumys istedi. Polıtsııa da tergeýdi aıaqtap, is prokýratýraǵa jiberildi.

«Naýryz aıynda osy faktige qatysty Qylmystyq kodekstiń 24-shi jáne 99-shy baptary boıynsha is qozǵalyp, tergeý júrgizildi. Sot-saraptamalyq jumystardyń barlyǵynyń qortyndylary shyqty. Qazir isti prokýratýra tekserip jatyr, odan keıin sotqa joldanady», - dedi SQO Polıtsııa departamentiniń bastyǵy Aıdyn Qabuldınov brıfıng barysynda.

Mektep basshylyǵy men synyp jetekshisi osy oqıǵaǵa qatysty ákimshilik jaýapkershilikke tartyldy. Buǵan deıin quzyrly organ ókilderi bala psıhıkalyq aýytqýshylyǵyna baılanysty dıspanserlik tirkeýde turǵanyn aıtqan bolatyn. Departament bastyǵynyń sózinshe, saraptama jumystary jasóspirimniń óz isine jaýap bere alatynyn kórsetti.