Petropavlda 145 tehnıka qalyń qardy tazalaýda
Soltústik Qazaqstan oblysynda eki kúnnen beri tolassyz qar jaýyp tur. Kólik qozǵalysyna kedergi keltirmeýi úshin kommýnaldyq kásiporyndar Petropavl qalasynyń kóshelerin qardan tazartyp jatyr. Turǵyn úı-kommýnaldyq sharýashylyǵy bólimi baspasóz qyzmetiniń málimetinshe, oblys ortalyǵynyń aýmaǵy 9 bólikke bólinip, kommýnaldyq kásiporyndarǵa bekitilgen. Qala joldaryn mehanıkalyq tazalaýǵa, qardy jınap, shyǵarýǵa jáne kóktaıǵaqqa qarsy reagentterdi sebýge 145 tehnıka ázirlengen.
Bıyl qala kóshelerine sebý úshin 2550 tekshe metr qum-tuz qospasy ázirlengen. Sonymen qatar, elimizdiń ózge qalalarynda qoldanylatyn «Antıled», «icemeit green» «icemeit rower» syndy reagentter de paıdalanylmaq. Mamandardyń sózine qaraǵanda, bul reagentter joǵary nátıje bergenimen, baǵasy qymbat. Sol sebepti negizinen bir táýlikte jaıaý júrginshiler jolyna, aıaldamalar mańy men joldarǵa ortasha alǵanda 70 tekshe metrden asa qum-tuz qospasy shashylady.
Oblys ortalyǵynda kóktaıǵaqqa qarsy jumystarǵa «Kommýnstroıservıs», «Kommýnhoz Petropavl» «Nord Joldary» JShS jaýapty. Bul jumystarǵa 5 tehnıka tartylǵan, tańǵy saǵat 5.00-den 7:30-ǵa deıin júrgiziledi. Al joldardaǵy qardy 12 kásiporyn shyǵarady. Bul jumystarǵa kúndelikti 40 tehnıka bólingen. Kóshelerdi qardan tazalaý túngi saǵat 22:00-den tańǵy 5.00-ge deıin atqarylady.