Petropavlda 14 jasynan kólik jóndegen bozbala deteılıng ortalyq ashýdy armandaıdy

<p>PETROPAVL. KAZINFORM &ndash; Petropavldyń 19 jasar turǵyny Dıas Aǵybaı oqýdan qoly bos ýaqytta kólik jóndeýmen aınalysady. Bes jylda ol 30 shaqty eski kólikti jóndep, jolǵa shyǵarǵan.&nbsp;</p>

Dıas Aǵybaı mashınanyń maıysqan jerin túzetip, isten shyqqan bólshegin salady. Bir ózi - elektrık, syrlaýshy, kóliktiń qozǵaltqyshyn da buzyp tastap, qaıta jınaıdy.

Jeńil kólikti jetik meńgergen bozbala qazir M.Qozybaev atyndaǵy Soltústik Qazaqstan ýnıversıtetiniń 3-kýrssynda grantta oqıdy. Alaıda bolashaq mamandyǵy qurylyspen baılanysty. 

«Alǵash ret kólikti 10 jasymda júrgizdim. Aýylǵa barǵan meni aǵam avtomatpen basqarylatyn kóligine otyrǵyzyp, rýldi senip tapsyrdy. Aýyl ishin aralap keldim. 

Al eń alǵashqy jeke kóligimdi 18 jasyma ákem syılady. Sóıtip, ýádesin oryndap, unatqan VAZ-2107-ni alyp berdi. Eskileý, biraq jóndeýge keletin. Ózim tozǵan bólshekterin aýystyryp, maıysqanyn túzep, durystap aldym. Qazir VAZ-09 mashınasyn minip júrmin. Atamnan alǵam, garajynda minilmeı turǵan ǵoı. Bul meniń - besinshi kóligim», - deıdi Dıas Aǵybaı. 

Ol kólikke degen qyzyǵýshylyǵynyń ákesinen daryǵanyn aıtty. 

«Kishkentaıymda qalamnan buryn qolyma buranda kiltin ustaǵan shyǵarmyn. Óıtkeni ákem kólik jóndeýmen aınalysty, men únemi qasynda júrdim. Al eń birinshi ret ózim jóndegen kólik – ákemdiki edi, dóńgelegin aýystyrdym. Ol kezde shamamen ondamyn. Al 14 jasymda ózdigimnen mashınalardy jóndeıtin jaǵdaıǵa jettim. 

Men jóndegen eń qymbat kólik – Taıota Kamrı. Jalpy japondyq kólikter óte myqty, yńǵaıly bolyp keledi. Desek te, sheteldik avtomat kólikterdi jóndeý qıyn. Usaq-túıek bólshekteri kóp, olar qymbat turady», - deıdi sheber jigit. 

Dıas VAZ markaly kólikterdi jóndegendi unatady, óıtkeni shyǵarmashylyqqa berilip, tolyqtaı ózgertýge múmkindik mol. 

«Kólikterdi jóndeýge tańdap qana alamyn, máselen sheteldik markaly mashınalar ádemileýge kelmeıdi, óıtkeni olarda bári zaýytta qarastyrylǵan. VAZ kóligi tıýnıngten jaqsy ótedi. Dóńgelegin aýystyryp, salonyn qalaǵanyńdaı ózgerte alasyń», - deıdi ol. 

Kólik jóndeý barysynda túrli qyzyqty oqıǵa da basynan ótken. 

«Reseılik bloger kelip, kezdesetin boldyq. Bir kún qalǵanda aýylǵa baryp, kólikti soǵyp aldym. Sol kúni keshke qalaǵa kelip, maıysqandaryn túzetip, ádemilep boıadym. Tańerteń tursam túnde jańbyr jaýǵan, boıaýym keýip úlgermegen, jańbyr tamshylary betine aıǵyzdalyp túsip qalǵan ǵoı. Qoltyraýynnyń terisi sııaqty bujyr-bujyr. Qaıta jóndeýge ýaqyt joq, ústinen jaltyraǵansha súrtip, azdap jónge keltirgendeı bolyp, kezdesýge bardym», - deıdi Dıas Aǵybaı. 

Sóz sońynda Dıas bolashaqta tolyq osy salaǵa bet buryp, deteılıng ortalyq ashýdy armandaıtynyn tilge tıek etti.