Petropavlda 12 adam úsik shalyp, aýrýhanaǵa túsken

PETROPAVL. QazAqparat – Petropavl qalalyq kópsalaly jedel medıtsınalyq járdem aýrýhanasyna jyl basynan jaraqat alǵan, úsik shalǵan 400-den astam adam qaralyp, medıtsınalyq kómek aldy, dep habarlaıdy QazAqparat tilshisi.

Petropavl qalalyq kópsalaly jedel medıtsınalyq járdem aýrýhanasy baspasóz qyzmetiniń málimetinshe, jaraqat bólimshesine qaralǵandardyń 150-i túrli synyq alǵan, taǵy 12 adam úsik shalyp, mamandardyń kómegine júginýge májbúr bolǵan.

«Úsik alǵandar negizinen mas kúıde túsedi. Olardy aman alyp qalý úshin ampýtatsııa jasaýǵa týra kelip jatady. Buryn negizinen qańǵybastar túsetin, al qazir spırttik ishimdik ishkender nemese jaraqat alyp, dalada jatyp qalǵandardy qabyldaımyz. Jyl basynan úsik alǵan 12 adamnyń tórteýin aýrýhanaǵa jatqyzýǵa týra keldi. Jeltoqsan aıynda qol-aıaǵyn úsitken 14 adam habarlasty. Olardyń beseýi jatqyzyldy. Qazirgi ýaqytta ampýtatsııa jasalǵan ekeýi áli em alyp jatyr», - deıdi aýrýhana dárigerleri.

Qazir qys qaharyna mingen shaq. Sondyqtan úsik alǵan jaǵdaıda birneshe keńesti esten shyǵarmaǵan jón.

«Zardap shekken adamdy jylytý úshin ony jyly jerge kirgizip, ystyq shaı nemese sút berý kerek. Zaqymdanǵan aıaq-qolyn jyly japqyshpen oraý qajet.

Qoldyń saýsaqtary qatty tońǵan jaǵdaıda qoltyqtyń astyna tyǵý arqyly jylytýǵa bolady. Eger muryndy úsik shalsa, ony jylytý úshin qoldyń jylýy jetkilikti. Teriniń jylyǵan aımaǵynyń qaıtadan tońýyna jol bermeńiz. Tin jıi qatyp, jylynatyn bolsa, soǵurlym zaqymdanýy múmkin.

Eger betti nemese muryndy úsik shalsa, jylytý úshin olardy ysqylaýǵa, sodan keıin zardap shekken adamdy úı-jaıǵa aparýǵa bolady. Úsik shalǵan jerlerdi qarmen ysqylaý durys emes. Qar odan saıyn úsitedi jáne usaq muz terini odan saıyn zaqymdaýy múmkin», - deıdi mamandar.

Al alǵashqy kómek kórsetilgennen keıin naýqasty aýrýhanaǵa tez jetkizgen jón. Óıtkeni azdap úsik shalý da organızmniń qorǵaný kúshin tómendetedi eken.