Petropavlda 11 myńnan astam adam jer telimin alýǵa kezekte tur
Petropavlda 10 sotyq jerge kezekke turǵandarǵa bıyl oblys ortalyǵynyń eki aýdanynan jer telimderi berilmek. Oblys ortalyǵyndaǵy «Solnechnyı» kenti jáne «Ońtústik» shaǵyn aýdanynda eki alań ázirlenedi. Máselen «Solnechnyı» kentinde qazirgi ýaqytta ınjenerlik-kommýnıkatsııalyq jeli tartylyp jatyr. Jospar boıynsha bul jumys osy jyldyń sońyna deıin aıaqtalyp, kezekte turǵan 357 adamǵa úı qurylysyn júrgizýge 10 sotyq jerden beriledi.
«Solnechnyı» kentinde baspana salýǵa 2 094 jer telimi bólingen. Onyń 565-inde qurylys jumystary júrip jatyr. 211-i «Nurly jer» baǵdarlamasy boıynsha berildi.
Al ekinshi alań - Jumysshy kentiniń syrtynda ornalasqan «Ońtústik» shaǵyn aýdanynda byltyrdan bastap sý qubyry tartylyp jatyr. Budan basqa elektr baǵanyn ornatyp jáne jol salýǵa jobalyq-smetalyq qujat ázirlengen. Bul jumystar 2022 jyly aıaqtalady dep josparlanǵan. «Ońtústik» shaǵyn aýdanynan 973 jer telimi berilmek.
Petropavl qalalyq ákimdigi mamandarynyń aıtýynsha, jańa aýdandarda halyqqa qajet mádenı-turmystyq nysandar da boı kóteredi. Jalpy jer telimi 3 jylǵa beriledi. Osy ýaqyt aralyǵynda jer paıdalanylmasa, onda ol memleket menshigine qaıtarylady. Buryn jer jekemenshikke berilip, ol qoldan-qolǵa satylyp kelgen. Endi alynǵan jerge 3 jyl ishinde mindetti túrde qurylys júrgizilýi qajet.
Petropavl qalasynyń saıtynda memleketten tıesili 10 sotyq jerdi alýǵa bir adamnyń 2003 jyldan beri kezekte turǵanyn kórýge bolady. Bıyl jer telimderin 2005 jyly ótinish bergender ala bastaıdy. Osyndaǵy qujatqa sensek, 2014 jyldan bastap 2019 jylǵa deıin oblys ortalyǵynda 450-ge jýyq adam úı qurylysyna jer ýchaskesin alǵan.