Petropavlda 100 myń AQSh dollary kóleminde para alǵan kásiporyn basshysy sottaldy

<p>PETROPAVL. KAZINFORM &ndash; Soltústik Qazaqstan oblysynda jyl basynan beri 36 sybaılas jemqorlyq qylmysy tirkeldi. Bul ótken jyldyń uqsas kezeńimen salystyrǵanda 9% kóp.</p>

Óńirlik kommýnıkatsııalar qyzmetinde «Jemqorlyqqa jol joq» taqyrybynda brıfıng ótti. SQO prokýratýrasy basqarmasynyń aǵa prokýrory Marat Qazıevtiń aıtýynsha, bıyl osy sanattaǵy qylmystardyń 25-in sybaılas jemqorlyqqa qarsy qyzmet, 3-in – ishki ister organdary, 5-in – UQKD, 3-in – ekonomıkalyq tergeý qyzmeti anyqtaǵan. 

«Qylmystyq qýdalaý organdarynda 54 is boldy, onyń 20-sy boıynsha is júrgizý aıaqtaldy, sotqa 20 is jiberilse, segizi aqtaý negizderi boıynsha toqtatyldy. Bıyl sybaılas jemqorlyq qylmystary boıynsha 37 adam kúdikti dep tanyldy, 14 adam aıyptalýshy retinde sotqa berildi. Sottalǵandardyń ishinde para alǵandar, memleket múlkin az jáne asa iri mólsherde urlaǵandar bar», - deıdi Marat Qazıev.

Máselen jaqynda kvazımemlekettik sektor sýbektilerine jatatyn jáne 100% memlekettiń qatysý úlesi bar iri kásiporyndardyń biriniń burynǵy basshysy 100 myń AQSh dollary mólsherinde para alǵany úshin sottaldy. Petropavl qalalyq soty ony 11 jylǵa bas bostandyǵynan aıyrdy. Úkim zańdy kúshine engen joq.

«Taǵy bir mysal keltirsem, byltyr tamyz aıynda oblystyq memlekettik kirister depratamentiniń qyzmetkeri elordalyq JShS-niń biriniń dırektorynan 10 myń teńge kóleminde para aldy. Ol bul somany qyzmettik ókilettigi boıynsha áreket etpeý úshin, ıaǵnı JShS-ni ákimshilik jaýapkershilikten bosatý maqsatynda ákimshilik hattama toltyrmaý úshin alǵan. Petropavl qalalyq sotynyń úkimimen para berýshi men alýshy kináli dep tanylyp, olarǵa para somasynyń 15-60 eselengen mólsherine deıin aıyppul salý túrinde jaza taǵaıyndaldy», - deıdi Marat Qazıev. 

Aǵa prokýrordyń aıtýynsha, sybaılas jemqorlyq qylmysyn jasaǵany úshin 100-den 1500 AEK-ke deıin, ıaǵnı 369 myń teńgeden 5,5 mln teńgege deıin ákimshilik jaýapkershilik kózdelgen. Sondaı-aq múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylady jáne úlken mólsherde aıyppul tóleıdi nemese 3 jyldan 15 jylǵa deıin bas bostandyǵynan aıyrylady. 

Buǵan deıin qansha adamǵa bıyl elektrondy bilezik taǵylǵanyn jazǵan edik.