Petropavlda 10 jasar naýqas qyzdy qutqarý úshin erekshe aktsııa ótip jatyr
10 jastaǵy Veronıka Shılovaǵa bas mıynyń obyry dıagnozy qoıylǵan. Petropavldaǵy 43 mekteptiń oqýshysy bıyl da 1 qyrkúıekte mektepke barmaıdy. Buǵan deıin birneshe otany ótkergen jasóspirimge taǵy da qymbat em qajet.
Áleýmettik jelidegi @veronika_help2019 paraqshasynda Bilim kúni qarsańynda «Gúldiń ornyna balalar» atty qaıyrymdylyq aktsııasy uıymdastyryldy.
Aktsııanyń maqsaty 1 qyrkúıek kúni ustazǵa synyp atynan bir shoq gúl syılap, al qalǵan gúl shoqtaryna jumsalatyn aqshany syrqat balanyń shotyna aýdarý.
«Em-dom óz nátıjesin berip jatyr. Qyzymyzdyń jaǵdaıy jaqsaryp keledi. Sol sebepti bizge kómek qajet, emdi sońyna deıin jetkizý úshin, aýrýdy jeńý úshin. Biz kez-kelgen kómekke razymyz. Sizdersiz biz bul qıyndyqty jeńe alatyn emespiz», - dep jazdy qyzdyń anasy Elına Shılova.
Elınanyń aıtýynsha, Veronıka qazir Sankt-Peterbýrg qalasynda 1 qyrkúıek kúni protondy-sáýleli terapııa alady. Tolyq em alý úshin áli de 402 myń rýbldeı jetpeıdi.
«Gúl solyp qalady, al bizdiń Veronıka mindetti túrde ómir súredi. Al kelesi jyly osyndaı qaıyrymdylyq aktsııasyna oqýshy retinde qatysady», - dep jazdy úmitin úzbegen anasy.