Petropavl JEO-2 jumysshysynyń qazasyna baılanysty eńbek ınspektsııasy tergeý júrgizbeıdi
SQO Memlekettik eńbek ınspektsııasy basqarmasynyń málimetinshe, 5 qarasha kúni «SevKazEnergo» AQ-ǵa qarasty Petropavldaǵy 2-Jylý-elektr ortalyǵynyń qazandyq tsehynyń bas korpýsyn jańartý barysynda 2000 jyly týǵan A.Isaev aýyr jaraqat alyp, ol aýrýhanada kóz jumdy.
Bul jerde qurylys jumystarymen «StroıTsentrArsenal» JShS merdiger uıym retinde aınalysqan. Al ol kompanııa óz kezeginde armatýramen jumys isteý úshin qaza tapqan jeke tulǵa A.Isaevpen shart jasasqan.
Sol kúni saǵat 12.00 shamasynda shatyrǵa elektr quraldary túsirilgen. Al Isaev janynda turǵan. Bir sát metall konstrýktsııalar syrǵyp ketip, jumysshyny basyp qalǵan.
«StroıTsentrArsenal» JShS dırektory bolǵan oqıǵa jaıynda Eńbek ınspektsııasyna habarlady.
«QR Eńbek kodeksiniń 186-babyna sáıkes, jumyskerlerdiń eńbek qyzmetine baılanysty densaýlyǵynyń zaqymdanýy jáne eńbekke jaramsyzdyqqa ne qaıtys bolýyna ákep soqqan jaǵdaılar tergeledi. Qaza tapqan A.Isaev pen «StroıTsentrArsenal» JShS arasynda azamattyq-quqyqtyq sıpattaǵy sharttyń jasalýyna baılanysty bul adamdardyń arasyndaǵy qatynas eńbek qatynasy bolyp sanalmaıdy. Sondyqtan QR Eńbek zańnamasymen emes, Azamattyq kodekspen retteledi. Bul jazataıym oqıǵa QR Eńbek kodeksinde kózdelgen arnaıy tergeýge jatpaıdy», - deıdi Eńbek qaýipsizdigi jáne eńbekti qorǵaýdy baqylaý bóliminiń basshysy, memlekettik eńbek ınspektory Azat Kósherbaev.
Qaza tapqan azamat Petropavlǵa Qyzylorda oblysynan tabys tabý úshin kelgen. «StroıTsentrArsenal» JShS onyń otbasyna materıaldyq kómek kórsetedi.
Buǵan deıin osy oqıǵaǵa qatysty «SevKazEnergo» AQ túsinik bergen edi.
Foto:media.informpskov.ru