Petropavl túrmesinde jazasyn óteýshi kóz jumdy: Tergeý bastaldy

PETROPAVL. QazAqparat – Soltústik Qazaqstan oblysy Qylmystyq-atqarý júıesi departamentiniń №48 mekemesinde jazasyn óteýshi qaıtys boldy, dep habarlaıdy QazAqparat tilshisi.

SQO Qylmystyq-atqarý júıesi departamenti baspasóz qyzmetiniń málimetinshe, oqıǵa 21 shilde kúni bolǵan. Petropavldaǵy №48 mekemede jazasyn ótep jatqan birneshe adam arasynda turmystyq janjal shyǵyp, ákimshilik qyzmetkerleri aralasqannan keıin basylǵan. Profılaktıkalyq áńgime barysynda sottalǵandardyń biri demala almaı, tunshyǵa bastaǵan. Mekeme qyzmetkerleri dereý jedel járdem qyzmetin shaqyrǵan. Mamandar kelgenshe ózderi alǵashqy medıtsınalyq kómek kórsetken. Alaıda, ol nátıje bermeı, kelgen jedel járdem dárigerleri er adamnyń ólgenin tirkedi.

«Bul fakti aqparatty esepke alý kitabynda tirkelgen, oqıǵa ornyna jedel-tergeý toby shaqyryldy. SQO Polıtsııa departamenti QR Qylmystyq kodeksiniń 106-baby 3-bóligi boıynsha sotqa deıingi tergeýdi bastady. SQO Qylmystyq-atqarý júıesi departamenti qyzmettik tergeý taǵaıyndady», - delingen baspasóz habarlamasynda.

Ázirge, jazasyn óteýshiniń neden qaıtys bolǵany belgisiz. Sarapshy deneni syrtqy tekserý kezinde jaraqat tappaǵan. Sottalǵannyń kóz jumý sebebi anyqtalyp jatyr.