Petropavl turǵynynan 200-den astam «tramadol» tabletkasy tárkilendi
SQO polıtsııa departamenti baspasóz qyzmetiniń málimetinshe, «Dármek» jedel-profılaktıkalyq is-sharanyń alǵashqy kúni Petropavlda taratylýy shektelgen «Tramadol» dárilik preparatyn zańsyz satý faktisi anyqtaldy. Dárini buryn isti bolǵan esirtkige táýeldi 34 jastaǵy áıel satyp kelgen.
«Áıeldiń turǵylyqty jerinen «Tramadoldyń» 160 tabletkasy men 57 kapsýla tárkilendi. Preparatty ol medıtsınalyq mekemelerdiń birinde jumys isteıtin dárigerden alǵany anyqtaldy. Al dáriger ony emdelýshisiniń retseptisi boıynsha alyp kelgen. Atalǵan fakti boıynsha materıaldar QR Ákimshilik quqyq buzýshylyq týraly kodeksiniń 424-baby «Zańsyz medıtsınalyq jáne (nemese) farmatsevtıkalyq qyzmet» boıynsha ákimshilik sotqa tapsyryldy», - deıdi SQO Polıtsııa departamenti Esirtki qylmysyna qarsy is-qımyl basqarmasy bastyǵynyń mindetin atqarýshy Ivan Terzıdı.
SQO polıtseıleri 5 qyrkúıekten bastap «Dármek» jedel-profılaktıkalyq is-sharasy aıasynda jumys istep jatyr. Aktsııa 9 qyrkúıekke deıin jalǵasady. Polıtseıler esirtkini paıdalaný jáne satý faktilerin anyqtaý úshin bilim ordalaryn jáne jastar bos ýaqyttaryn ótkizetin oryndardy tekserip jatyr. Medıtsına mekemelerinde, dárihanalarda jáne kásiporyndarda esirtkini, psıhotroptyq zattardy jáne prekýrsorlardy satyp alý, saqtaý, esepke alý, paıdalaný jáne joıý erejeleriniń saqtalýy da nazarda bolady. Farmatsevtıkalyq baqylaý basqarmasynyń qyzmetkerlerimen birge tártip saqshylary quramynda kodeın bar dárilik preparattardy retseptsiz satý faktilerin anyqtaý boıynsha da jumys júrgizýde.