Petropavl turǵynyn ınternet alaıaqtar 12 mln teńgege taqyrǵa otyrǵyzdy

PETROPAVL. QazAqparat – Petropavl turǵyny ınternet-alaıaqtardyń quryǵyna túsip, jıǵan-tergen 7 mln jáne nesıege alǵan 5 mln teńgesinen aıyrylyp qaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, petropavldyq áıel ulynyń oqýyna dep depozıtke aqsha jınaǵan.

Alaıda ınternet-alaıaqtardyń arbaýyna túsip, bir kúnde bar qarajatynan aıyrylyp qaldy.

Naýryz aıynyń ortasynda oǵan banktiń qaýipsizdik qyzmetiniń qyzmetkerimin jáne banktiń menedjerimin dep tanystyrǵan belgisiz er adam men qyz habarlasqan.

Olar onyń atyna 7 mınýt buryn bóten adamnyń iri kólemde nesıe resimdegenin aıtyp, qala turǵynyn sendirgen.

Alaıaqtardyń áreketterinen qorǵaný úshin oǵan «esepshotty jańartý» qajettigin, ıaǵnı depozıtten aqshany alyp, jańa ashylǵan esepshotqa salýdy usynǵan.

Jábirlenýshi habarlasqan adamdarǵa kópke deıin senbegen, bank fılıalyna baratynyn aıtqan.

Alaıda qylmyskerler ony bulaı jasamaýǵa kóndiredi. Áıelge barlyq qarajat qaıtarylady dep ýáde bergen.

Jábirlenýshi alaıaqtardyń nusqaýyn túgel oryndap, óziniń 7 mln teńgeden astam aqshasyn, alǵan nesıesin birneshe Qiwi-ámııannyń esepshotyna aýdaryp jibergen.

Jalpy alǵanda qylmyskerler 11 mln 865 myń teńgeni qoldy qylǵan.

Aldanǵanyn bilgen áıel polıtsııaǵa júgindi. Bul fakti «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Krımınaldyq polıtsııa qyzmetkerleri jedel-izdestirý sharalaryn júrgizip jatyr.

«Búginde «banktiń qaýipsizdik qyzmetinenbiz» dep qońyraý shalý arqyly aldaý - eń keń taralǵan tásilderdiń biri. Oǵan qazir kóbi sene bermeıdi, sebebi adamdar kıberqylmyskerlerdiń bul amaly jaıly biledi. Soǵan qaramastan, keıde qaskóıler ózderiniń qurbandaryna psıhologııalyq qysym jasaý arqyly sheberlik tanytady. Telefon shalǵan jaǵdaıda kúmán týsa, bank fılıalyna baryp qana shottyń jaǵdaıy jaıly bilý kerek. Naqty bank qyzmetkerleri qandaı jaǵdaı bolmasyn, eshqashan klıentterge telefon arqyly qarjylyq operatsııalar jasamaıdy, qupııa derekterdi ataýdy talap etpeıdi», - deıdi SQO polıtsııa departamenti krımınaldyq polıtsııa basqarmasy bastyǵynyń orynbasary Marat Jumalıev.

Jalpy oblysta jyl basynan beri 202 ınternet-alaıaqtyq tirkeldi. Onyń 52-sinde qylmyskerler ózderin «banktiń qaýipsizdik qyzmetiniń qyzmetkerimiz» dep tanystyrǵan.

Aqerke Dáýrenbekqyzy