Petropavl turǵyny jalǵan senimhatpen týystarynyń úılerin satyp jibergen
SQO polıtsııa departamenti baspasóz qyzmetiniń málimetinshe, 34 jastaǵy petropavldyq jaldamaly páterlerde jasyrynyp, týystarymen jáne tanystarymen qarym-qatynasqa shyqpaǵan. Er adam týystarynyń eki páterin jalǵan senimhat boıynsha satty degen kúdikke ilingen.
SQO PD Krımınaldyq polıtsııa basqarmasynyń qyzmetkerleri onyń júrgen jerin qyzmettik issapar kezinde anyqtady. Qazirgi ýaqytta kúdikti ustalyp, Nur-Sultan qalasynyń tergeý ızolıatoryna ornalastyryldy.
«Qylmyskerlerdi izdestirý – krımınaldyq polıtsııa qyzmetkerleriniń jumysyndaǵy basty mindetterdiń biri. Bul is-shara ýchaskelik polıtsııa ınspektorlarymen, kóshi-qon qyzmeti jáne basqa da bólinis qyzmetkerlerimen birge ótkiziledi. Aıta ketetini, «Zańsyz kelýshi» jedel-profılaktıkalyq is-sharasy kezinde Mamlıýt aýdanynyń polıtseıleri aýdan ortalyǵynyń 61 jastaǵy turǵynyn ustady. Ol Bashqurtstan aýmaǵynda jasalǵan alaıaqtyq úshin memleketaralyq izdeýge jarııalanǵan», – dedi Krımınaldyq polıtsııa basqarmasynyń bastyǵy Marat Jumalıev.
Jalpy, 6 aı ishinde SQO-da izdeýde 60 adam bolǵan. Jyl basynan krımınaldyq polıtseıler 30 qylmyskerdiń júrgen jerin anyqtaǵan. Іzdestirý jumysynda «ótken jylǵy» sanatyndaǵy qylmyskerlerdi izdeýge erekshe kóńil bólinedi. Jyl basynan osy sanat boıynsha 10 qylmysker ustaldy. Budan bólek 228 iz-tússiz joǵalǵannyń júrgen jeri anyqtalǵan.