Petropavl turǵyny páterinde 20 túp marıhýana ósirgen

PETROPAVL. QazAqparat – Petropavl turǵynynyń páterinen 20 túp marıhýana jáne fıtozerthananyń jabdyqtary tabyldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 46 jastaǵy turǵyny páterinde gúl egetin qumyrada 20 túp marıhýana ósirgen. Tártip saqshylary onyń baspanasynan fıtolampa, klımatty baqylaıtyn qurylǵy jáne fıtozerthananyń basqa da jabdyqtaryn tapty.

Kúdiktiniń aıtýynsha, esirtkini ózi qoldaný úshin úıde ósirgen.

Atalǵan fakti QR Qylmystyq kodeksiniń «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» jáne «Quramynda esirtki zattar bar, ósirýge tyıym salynǵan ósimdikterdi zańsyz egip-ósirý» boıynsha Sotqa deıingi tergep-tekserýlerdiń biryńǵaı tizilimine engizildi.

«Saraptama zertteýge berilgen úlgiler quramynda kannabıs tektes esirtki zattary bar ósimdik ekenin kórsetti. Tamyrlarymen birge jalpy massasy – 5,650 kg, bul iri kólemge jatady. Esterińizge salamyz, quramynda esirtki tektes zattar bar ósimdikterdi zańsyz ósirgeni úshin 2 000 AEK deıin, ıaǵnı 5 mln 834 myń teńge aıyppul salý jazasy qarastyrylǵan. Eń joǵary jaza – 2 jylǵa deıin bas bostandyǵynan aıyrý», - deıdi SQO PD esirtki qylmysyna qarsy is-qımyl basqarmasynyń bastyǵy Jandos Basybaev.

Jyl basynan SQO aýmaǵynda 114,5 kg astam túrli esirtki zattary alyndy, onyń 1 kg 429 gr sıntetıkalyq esirtki.