Petropavl turǵyny 600-den astam atýǵa jaramdy patron saqtaǵan

Urlyq jasaǵany úshin jazasyn ótep jatqan Petropavl turǵyny atýǵa jaramdy patrondardy zańsyz saqtaǵanyn moıyndap, bir qap oq-dáriniń jatqan jerin kórsetti, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, petropavldyq polıtseıler qaladaǵy saıajaı ýchaskeleriniń biriniń mańynan 5 lıtrlik plastmassa bótelkeni tapty. Onyń ishinde qapqa oralǵan oq-dári bolǵan. Patrondar ıir uńǵyly qarýǵa arnalǵan eken. 5,45 mm kalıbrli oq-dáriniń jalpy sany – 659.

Sarapshylardyń qorytyndysyna sáıkes olar atýǵa jaramdy ekeni anyqtaldy.

Bul fakti QR Qylmystyq kodeksiniń 287-babynyń 3-bóligi boıynsha sotqa deıingi tergep-tekserýlerdiń biryńǵaı tizilimine engizildi.

«QR QK 287-babyna sáıkes, zańsyz saqtalǵan qarý men oq-dárilerdi erikti túrde tapsyrǵan jaǵdaıda, eger áreketinde qylmys belgileri bolmasa zań aldyndaǵy jaýapkershilikten bosatylady. Qazir istiń barlyq mán-jaıyn anyqtaý maqsatynda tergeý júrgizilip jatyr», - deıdi Petropavl qalalyq PB Birinshi polıtsııa bóliminiń bastyǵy Tilegen Áljanov.