Petropavl turǵyny 560 doza esirtkimen ustaldy
Soltústik Qazaqstan oblysy polıtsııa departamenti baspasóz qyzmetiniń málimetinshe, esh jerde jumys istemeıtin 29 jastaǵy petropavldyq polıtseılerdiń nazaryna úsh aı buryn ilikken. Jedel ýákilder jas jigittiń esirtki saýdasyna qatysy bar-joǵyn anyqtaý úshin jumys júrgizdi.
24 naýryz kúni tártip saqshylary jigitti Petropavldaǵy páterinde ustady. Onda ósimdik salynǵan paket pen oramalar alyndy. Saraptama qorytyndysyna sáıkes alynǵan zattar marıhýana jáne gashısh bolyp shyqty. Marıhýananyń jalpy salmaǵy 1,5 keli, bul 350 doza shamasynda jáne 870 gramm gashısh, bul 218 doza bolady. Ekeýi de asa iri kólemge jatady. Budan basqa 3 uıaly telefon, aqsha, bank kartalary alyndy.
Sol kúni negizgi kúdiktiden esirtki satyp alyp, qala kóshelerinde saýdalaǵan 24-26 jas aralyǵyndaǵy tórt sybaılasy da ustaldy. Esirtki saýdasyn uıymdastyrǵan er adam ýaqytsha ustaý ızolıatoryna qamaldy. «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baby boıynsha sotqa deıingi tergeý júrgizilip jatyr.
«Negizgi kúdikti esirtki saýdasyn uıymdastyrǵanymen, ózi nashaqor emes, ózi tatyp ta kórmepti. Kúdiktimen birge onyń sybaılastaryn ustaý da mańyzdy boldy. Esirtki satqany úshin 20 jyl merzimge deıin bas bostandyǵynan aıyrý jazasy barlyǵyn eske salamyz», - deıdi Petropavl qalalyq polıtsııa basqarmasynyń bastyǵy Jandos Muqatov.