Petropavl turǵyny 1,5 ǵasyrlyq myltyqty polıtsııaǵa tapsyrdy
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl turǵyny eski garajyn buzǵan kezde eden astynan túıinshek taýyp alǵan. Ol mataǵa oralǵan kóne myltyq bolyp shyǵady. Er adam tabylǵan zatty birden qalalyq polıtsııa basqarmasyna tapsyrypty.
Zertteý barysynda krımınalıster bul qarýdyń ańshy myltyǵyna qoldan ózgertilgen, halyq arasynda «frolovka» dep atalyp ketken 1870 jylǵy Berdan vıntovkasy ekenin anyqtady.
Tarıhı derekkózderge súıensek, XIX ǵasyrdyń aıaǵynda Berdan vıntovkalary ańshy myltyǵy retinde satylǵan. Keıin 1920 jyldary bul vıntovkalar Týla qarý zaýytynda 28-shi kalıbrli qarýǵa ózgertilip shyǵaryldy.
«Krımınalısterdiń qorytyndysyna sáıkes qarý atýǵa jaramsyz. Qazirgi ýaqytta sırek kezdesetin myltyqty oblystyq polıtsııa departamentiniń mýzeıine tapsyrý máselesi sheshilip jatyr. Tirkelmegen qarýdy óz erkimen tapsyrý nátıjesinde zańsyz saqtaǵany úshin qylmystyq jáne ákimshilik jaýapkershilikten bosatylatynyn eske salamyz», - deıdi SQO PD Ákimshilik polıtsııa basqarmasynyń erekshe tapsyrmalar jónindegi aǵa ınspektory Qurman Mýsın.
Buǵan deıin balyq aýlaýǵa barǵan Petropavl turǵynynyń qarmaǵyna myltyq ilikkenin aıtqan edik.