Petropavl turǵyny 20 jyldan beri joq kólikke salyq tólep keledi

<p>PETROPAVL. KAZINFORM — Petropavlda respýblıkalyq «Halyq zańgeri» aktsııasy ótti. Quqyqtyq kómekti tegin alýǵa kelgender ádilet organdary, prokýratýra, sybaılas jemqorlyqqa qarsy qyzmet — barlyǵy 20-dan astam mamanǵa júgindi.</p>

 Petropavl turǵyny Janat Qarıev osydan 20 jyl buryn halyq arasynda «kopeıka» atalyp ketken Jıgýlı avtokóligin satqan.

Biraq osy kúnge deıin jylda joq mashınanyń salyǵyn tólep keledi.

Basynda 6 myń teńge bolsa, qazir salyǵy 9 myń teńgege jetken. 

«Tólemep edim, maǵan „arest“ qoıdy. Atymnan shyǵaraıyn desem, kólik joq. 40 jyldyq mashına ǵoı, bir jerde búginde shirip jatqan shyǵar. Qaıdan tabamyn. Satyp alǵan adamdy izdestirdim, Beskól turǵyny osydan 17 jyl buryn qaıtys bolǵan eken. Jol polıtsııasyna bar dedi, odan anyqtama aldym, Halyqqa qyzmet kórsetý ortalyǵyna bar dedi, olar biz bul máseleni sheshe almaımyz dedi. Prokýratýra kómektese almaıtynyn aıtty. Eki ret — Petropavl qalalyq jáne Beskól aýdandyq sotyna berdim, nátıje bolmady», — deıdi Janat Qarıev. 

Qala turǵyny «Halyq zańgeri» respýblıkalyq aktsııasyna kelip, mamandardyń kómegine júgindi. 

«Ádilet departamenti basshysymen sóılestim, máseleni sheshýge bolatynyn aıtty, kómektesetin boldy», — deıdi Janat Qarıev. 

Іs-sharaǵa kelgen turǵyndardyń qarasy qalyń boldy. Áleýmettik aktsııa endi aýdan ortalyqtarynda jalǵasyn tappaq.