Petropavl soty áleýmettik jeli arqyly ózgeni qorlaǵan er adamǵa úkim shyǵardy
Petropavl qalalyq sotynyń málimetinshe, 28 mamyr kúni Qýatbek Imanbekov Almaty qalasynda otyryp, ar-ojdanǵa nuqsan keltirý maqsatynda «Facebook» áleýmettik jelisinde S. degen azamatqa qatysty ádepsiz jazba qaldyryp, qorlaǵan.
Qýatbek Imanbekovke qatysty qylmystyq is sotta qaraldy. Sottalýshy óz kinásin moıyndady. Aıtýynsha, bul áreketke barýyna S. ıtermelegen. Óıtkeni qylmys jasaǵandardy jaýapkershilikten bosatqan. Q. Imanbekov óz jazbasy arqyly onyń abyroıyn tókkeni úshin keshirim surady.
Petropavl qalalyq soty 4 qarasha kúni Q.Imanbekovti kináli dep tapty. Sot úkimi boıynsha endi 100 AEK mólsherinde – 277 800 teńge aıyppul tóleıdi.
Sondaı-aq Imanbekov turǵylyqty jeri boıynsha májbúrli túrde psıhıatrǵa tekserilip, ambýlatorlyq emdeýden ótedi.