Petropavl polıtsııasyna mereke kúnderi 2 myńǵa jýyq qońyraý tústi

PETROPAVL. QazAqparat – Petropavl polıtseıleri mereke kúnderi atqarylǵan qyzmetteri týraly aıtty, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Naýryz meıramyn merekeleý kúnderi oblys turǵyndarynyń qaýipsizdigin qamtamasyz etý maqsatynda arnaıy qyzmetter, sonyń ishinde polıtsııa qyzmetkerleri kúsheıtilgen tártipte jumys istedi. Basty mindet – qoǵamdyq tártip pen azamattardyń qaýipsizdigin saqtaý, qońyraýlarǵa jedel den qoıý jáne tótenshe jaǵdaılarǵa jol bermeý boldy.

Kún saıyn qoǵamdyq tártipti saqtaýǵa Petropavl qalasynda 160-tan astam polıtsııa qyzmetkeri jumyldyryldy. Onyń 31-i – avtopatrýl, 8-i – «Modýl» statsıonarlyq beketteriniń kezekshi aýysymdary, qalǵany – jaıaý jasaqtar.

Petropavl qalalyq polıtsııa basqarmasy jedel basqaraý ortalyǵynyń bastyǵy Erik Quljanovtyń aıtýynsha, naýryzdyń 19-y men 23-i aralyǵynda qalalyq polıtsııanyń «102» arnasyna 1842 telefon qońyraýy kelip túsken. Olardyń 400-ine polıtsııa shuǵyl áreket etti. 27 jaǵdaı otbasylyq janjaldarǵa, 17-si túngi ýaqytta tynyshtyqty buzýǵa qatysty bolǵan. Bir táýlikte orta eseppen alǵanda tártip saqshylaryna 550 habarlama kelip túsken.

Qońyraýlardyń deni saǵat keshki 18.00-den tún jarymǵa deıingi aralyqta túsip otyrǵan.

Polıtsııanyń jaıaý jáne kólik jasaqtarymen qatar jedel basqarý ortalyǵyndaǵy beınebaqylaý ınspektorlary bólek jospar boıynsha jumys istedi. Nátıjesinde kóshelerde, kóshe qıylystary men alańdarda ornatylǵan beınebaqylaý kameralarynyń kómegimen 52 ákimshilik quqyq buzýshylyq anyqtaldy. Onyń kóbi – qoǵamdyq oryndarda mas kúıde júrý faktileri.

Jalpy, mereke kúnderi Petropavlda jaǵdaı turaqty boldy, rezonanstyq qylmystar tirkelmegen.