Petropavl páterlerine «aqyldy» esepteýishter ornatylyp jatyr

PETROPAVL. QazAqparat - Petropavlda turǵyn úı-kommýnaldyq sharýashylyq salasyna tsıfrlandyrý jańalyqtary engizilip jatyr, dep habarlaıdy QazAqparat tilshisi.

Óńirlik kommýnıkatsııalar qyzmetiniń málimetinshe, páterlerge «aqyldy» esepteýishterdi ornatý jobasy synaq retinde iske asyrylýda.

Jýkov kóshesi, 40-úı mekenjaıynda ornalasqan turǵyn úıge esepteýishterdi «aqyldy» etetin modemder ornatylyp jatyr. Olar jergilikti Kırov atyndaǵy zaýytta jasalǵan.

«Modemderdi «KazSmartSys» JShS ornatyp jatyr. Ol ystyq-sýyq sýdyń, gaz ben elektrdiń kórsetkishterin avtomatty túrde Internet arqyly ortalyq serverge tikeleı jiberip otyrady», - deıdi qalalyq turǵyn úı ınspektsııasy bóliminiń ókilderi.

Zaýyt 250 modem shyǵaryp úlgergen. Páterlerge qazirge deıin 15 qurylǵy ornatylǵan.

Tórt turǵyn úıge sýdy esepteıtin jalpyǵa ortaq qurylǵy ornatylǵan. Kórsetkishter «KazSmartSys» kompanııasynyń ortalyq serverine jiberiledi. Turǵyn úı ınspektsııasynyń málimetinshe, 1072 kópqabatty úıdiń 757-sine (537-si - memlekettik baǵdarlama negizinde) jylý eseptegishter ornatylǵan.

Petropavlda elektr energııasyn kommertsııalyq esepteýdiń avtomatty júıesi de engizilgen. Qalada osy júıeniń 26 esepteýishi bar.