Petropavl men Shymkentte Nazarbaev Ýnıversıtetiniń tájirıbesimen 2 ozyq JOO ashylady

NUR-SULTAN. QazAqparat – Nazarbaev Ýnıversıtetiniń tájirıbesi negizinde 2 ozyq joǵary oqý orny qurylady. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Nazarbaev Ýnıversıtetiniń tájirıbesi boıynsha ınnovatsııalar men serpindi tehnologııalardy damytý, ozyq ǵylymı-zertteý ortalyqtaryn qalyptastyrý úshin ósý ortalyqtary bolatyn 2 ozyq joǵary oqý orny qurylady. Petropavl men Shymkent qalalarynda osy jumys bastalyp ketti», - dedi Ashat Aımaǵambetov.

Onyń atap ótýinshe, elimizdiń básekege barynsha qabiletti 20 joǵary oqý ornynyń bazasynda «akademııalyq artyqshylyq» ortalyqtary qurylady.

«Bul jumys bastaldy. Bul maqsatta bıýdjetten qomaqty qarjy bólý kózdelgen. Krıterııler boıynsha 15 myqty óńirlik joǵary oqý orny jáne 5 myqty pedagogıkalyq joǵary oqý orny iriktelip, laboratorııalary jańartylyp, jańa deńgeıge kóteriledi», - dedi mınıstr.

Ashat Aımaǵambetovtiń aıtýynsha, bilim sapasyn jaqsartý jónindegi sharalardy iske asyrý nátıjesinde 2025 jylǵa qaraı 3-6 jas aralyǵyndaǵy balalardy balabaqshamen qamtý 100 paıyzǵa jetkiziledi, 3 aýysymdy oqytý joıylady jáne 800 mektep salynady.

«PISA halyqaralyq zertteýinde oqýshylardyń nátıjelerin 40 balǵa jaqsartý boıynsha jumys júrgiziledi. 15 ýnıversıtet dúnıejúzilik reıtıngterde oryn alady. NEET sanatyndaǵy jastar úlesi tómendetiledi. 5000 mektepti jańǵyrtý josparda bar. Pedagogtermen qamtý máselesin tolyq sheshemiz. 20 zamanaýı, úzdik ýnıversıtet qalyptastyrý kózdeldi. Barlyq tapsyrma qatań baqylaýda bolady», - dedi ol.