Petropavl Qazaqstan men Reseı shekaralyq yntymaqtastyq forýmyna daıyndalýda

PETROPAVL. QazAqparat - Petropavl qalasy Qazaqstan men Reseı shekaralyq yntymaqtastyq forýmynyń qonaqtaryn qarsy alýǵa qyzý daıyndyq ústinde. Birqatar nysandar kúrdeli jóndeýden ótip, endi biri jańadan qoldanysqa berilmek. Olardyń ishinde meıramhana men qonaq úı de bar, dep habarlaıdy QazAqparat.

Petropavldaǵy «Esil» meıramhanasy 1984 jyly ashylǵan, alaıda, osy kúnge deıin kúrdeli jóndeý kórmepti. 4 zaly bar meıramhana 150-den 50 adamǵa deıin syıǵyza alady. Jańa jylda bastalǵan jóndeý jumystary barysynda ǵımarattyń shatyry aýystyryldy. Birinshi jáne ekinshi qabattaryndaǵy árleý jumystary da aıaqtalýǵa jaqyn.

«Royal Palace» meıramhana-qonaq úı kesheni qarasha aıynda ashylady. Jalpy aýmaǵy - 3000 sharshy metr. Keshen ekige bólingen, onyń jartysynda 10 bólmesi bar qonaq úı ornalassa, ekinshisinde 600 oryndyq toıhana bolady. Sonymen qatar, 200 oryndyq kishi zal, karaoke-bar jáne taǵy da basqa kóńil kóterer demalys oryndary josparlanǵan. Keshenniń quny 600 mln teńge.

«Green Park» otbasylyq demalys orny forýmnyń 200 qonaǵyn qarsy alatyndaı múmkindigi bar. Toǵyz úıden turatyn keshende qazir jańa meıramhana qurylysy júrip jatyr.

«Barlyq aýmaqqa ǵalamtor jelisi tartyldy. Qonaqtardy úılerde ǵana emes, qajet bolsa, arnaıy bólingen as úıde tamaqtandyra alamyz. 45 qyzmetkerimiz bar, olar joǵary daıyndyqtan ótken. Sondyqtan, qonaq kútýge qosymsha adam tartpaımyz», deıdi «GREEN PARK» dırektory Maksım Kalının.

9 qarashada ótetin Qazaqstan men Reseı shekaralyq yntymaqtastyq forýmynyń basty taqyryby - týrızm salasyn damytý, sondyqtan da Qyzyljar óńiri kórshilerge qonaqjaılylyǵyn kórsetip, demalys oryndaryn nasıhattamaq.

Aqerke Qabykeeva