Petropavl áýejaıynyń baǵyttary bıyl da sýbsıdııalanady

PETROPAVL. QazAqparat – Petropavldaǵy halyqaralyq áýejaı arqyly byltyr 1,3 myń áýe reısi jasaldy. Osy aralyqta 76 myń adam ushqan, bul kórsetkish onyń aldyndaǵy jylmen salystyrǵanda úsh ese artyq, dep habarlaıdy QazAqparat tilshisi.

Soltústik Qazaqstan oblysy jolaýshylar kóligi jáne avtomobıl joldary basqarmasy basshysynyń orynbasary Mırhat Ábilmájinovtyń aıtýynsha, byltyr Petropavl áýejaıynyń múliktik kesheni «Qyzyljar halyqaralyq áýejaıy» JShS keıin satyp alýǵa quqyq beretin senimgerlik basqarýǵa berildi.

«Qazir Qyzyljar halyqaralyq áýejaıy jumys istep tur, ushýǵa jaramdylyq sertıfıkaty bar. 133 adam eńbek etedi. Olardyń ortasha eńbekaqysy - 98 myń teńge. Eńbekaqy boıynsha qaryz joq», - deıdi Mırhat Ábilmájinov.

Búginde Petropavl áýejaıynan Astanaǵa jáne Almatyǵa ǵana reıster bar. Bul baǵyttarǵa bıýdjet esebinen jyl saıyn sýbsıdııa bólinedi. Byltyr tek Almaty qalasy boıynsha 752 mln teńge bólindi. Astana baǵyty boıynsha 702 mln teńge jumsaldy. Bul qarajat tolyq ıgerildi.

«Byltyr jeltoqsan aıynda Azamattyq avıatsııa komıteti keler jyldy sýbsıdııalaý boıynsha konkýrstyq rásim ótkizdi. Konkýrstyń nátıjesi boıynsha Almaty baǵytyn «SCAT» kompanııasy jeńip aldy. Astana qalasyna «Qazaq Air» ushaqtary ushatyn boldy. 474 mln teńge sýbsıdııa Astana baǵyty boıynsha, 520 mln teńge Almaty baǵyty boıynsha berildi», - deıdi basqarma basshysynyń orynbasary.

Mamannyń aıtýynsha, qazirgi ýaqytta halyqaralyq áýejaıda birqatar shekteý bar. Ol áýe otynyn ústep quıýǵa baılanysty. Qondyrǵyny jańǵyrtýdan ótkizip, suıyq otyn quıatyn stansany retke keltirý qajet.

«Ekinshi shekteý ushý ýaqytyna baılanysty. Áýejaı tek jaryq ýaqytta ǵana ushaqtardy qabyldap, ushyra alady. Óıtkeni sıgnal jabdyǵy joq. Búginde áýejaı tıisti sharalardy qolǵa alyp jatyr. Jeke ınvestor bul shekteýlerdi alyp tastaý úshin qarajat bólýde. Maýsym aıyna deıin tıisti jumystar atqarylady, keıin áýejaı tolyq qýatynda jumys isteýge kóshedi. Tek osydan keıin ǵana qosymsha avıareısterdi ashý úshin jeke kompanııany tartý máselesi qaralady. Túrkistanǵa, Shymkentke jáne taǵy birneshe shetelge baǵyt ashý josparda bar», - deıdi Mırhat Ábilmájinov.

Byltyr Petropavl áýejaıynan 1295 reıs jasalsa, sonyń 200-i charterlik. 76 myń adam kóliktiń osy túrin tańdaǵan. Bul, 2021 jylmen salystyrǵanda úsh ese, ıaǵnı 373 % artyq.

Bıyl Astana men Petropavl arasynda 10 aı boıy aptasyna 7 ret, 2 aı aptasyna 8 ret ushaq ushpaq. Al Almaty men Petropavl arasynda 9 aı boıy aptasyna 5 ret ushsa, jazdyń úsh aıynda aptasyna 7 ret baǵyt ashylady. Ázirge bılet baǵasynda ózgeris joq.