Petropavl áýejaıynan tórt qalaǵa ushaq ushyp, reıster sany ulǵaımaq
Soltústik Qazaqstan oblysynda óńir basshysy Qumar Aqsaqalovtyń qatysýymen jolaýshylar kóligi jáne avtomobıl joldary basqarmasynyń alqa otyrysy ótti. Vedomstvo ótken jyldy qorytyndylap, bıylǵy basymdyqtardy aıqyndady. Basqarma basshysy Maqsat Baıahmettiń aıtýynsha, Petropavl halyqaralyq áýejaıynyń qordalanǵan máselesi sheshimin taýyp jatyr.
«Byltyr áýejaıdyń dúnıe-múlki qabyldanyp, qujattary durystaldy, sonyń ishinde bankrot dep tanylǵan kásiporynnyń múlkin satyp alý boıynsha jumystar júrgizildi. Respýblıkalyq menshikten áýejaı qajettiligi úshin mamandandyrylǵan tehnıka tegin alyndy. Jumysshylardyń eńbekaqy boıynsha qaryzy tolyq jabyldy. Áýejaı úsh aıǵa toqtap, 8 tamyzdan bastap jumysyn jandandyrǵan edi. Áýe reısterin sýbsıdııalaý nátıje berdi. Byltyr osy maqsatqa Almaty, Nur-Sultan, Túrkistan baǵyttaryna 932 mln teńgege jýyq qarajat bólindi. Tamyz-jeltoqsan aılarynda 16 179 jolaýshy áýe tasymalyn qoldanǵan. Al qańtar-mamyr aıynda 4038 jolaýshy ushqan, ıaǵnı kórsetkish 4 esege artty», - dedi Maqsat Baıahmet.
Bıyl bul úsh baǵyttyń qataryna Shymkent qalasy qosylmaq. Áýe reısterin sýbsıdııalaýǵa 1,6 mlrd teńge bólindi.
«SQO-ny áleýmettik-ekonomıkalyq keshendi damytý josparyna sáıkes bıýdjetten bólingen qarjyǵa áýe reısteriniń sany artady. Nur-Sultan qalasyna kúndelikti, Almatyǵa 5 ret, Shymkentke 3 ret, al Túrkistanǵa aptasyna eki ret ushaq shyǵarý josparlanǵan. Qazirgi ýaqytta Nur-Sultan qalasyna aptasyna 3 ret ushaq ushyrý boıynsha kelisim jasaldy. Olar keıin jıilikti arttyrady. Al qalǵan Almaty, Shymkent jáne Túrkistan baǵyttary boıynsha ázirge áýe kompanııalary anyqtalǵan joq», - deıdi basqarma basshysy.