Petropavl ákimdigi páterdi eki ese qymbat baǵaǵa satyp almaq bolǵan
Óńirlik kommýnıkatsııalar qyzmetinde Sybaılas jemqorlyqqa qarsy is-qımyl agenttigi SQO boıynsha departamenti basshysynyń birinshi orynbasary Aıdos Júnisov atqarylǵan jumys týraly baıandady.
Sybaılas jemqorlyqqa qarsy qyzmet jumysynyń bir baǵyty - memlekettik satyp alý júıesin únemi nazarda ustap, bıýdjet qarajatynyń negizsiz jumsalýyna jol bermeý.
«Memlekettik satyp alýdy josparlaý kezeńinde de taýarlardyń qunyn jasandy túrde kóterýdiń aldyn alý maqsatynda kúndelikti monıtorıng júrgiziledi.
Osy baǵyttaǵy profılaktıkalyq jumys bıýdjet qarajatyn neǵurlym únemdi jáne tıimdi bólýge múmkindik beredi.
Nátıjesinde 27 taýardy satyp alýǵa josparlanǵan 505 mln teńge somasynyń satyp alý quny tómendetildi. 22 memlekettik organ baǵany tómendetý boıynsha sharalar qabyldady», - deıdi Aıdos Júnisov.
Satyp alý qunyn tómendetkenderdiń ishinde «Soltústik Qazaqstan aýyl sharýashylyǵy tájirıbe stantsııasy» JShS de bar. Olar jazǵy dızel otynyn satyp alý baǵasyn 2 esege qysqartty, lıtrin 450 teńgeden 263 teńgege deıin tómendetip qaıta qarady, osylaısha 243,1 mln teńge bıýdjet qarajatynyń utymsyz jumsalýyna jol berilmedi.
«Petropavl qalasy ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi 4 bólmeli páterdi 63,8 mln teńgege satyp alýdy josparlaǵan. Sybaılas jemqorlyqqa qarsy qyzmettiń aralasýynan keıin ákimshi Memlekettik satyp alý josparyna osy tarmaq boıynsha ózgerister engizdi, osylaısha 35,1 mln teńge únemdeldi», - deıdi Aıdos Júnisov.