Petropavl ákiminiń agronommen bolǵan janjaly ádep keńesinde qaralady

PETROPAVL. QazAqparat - Soltústik Qazaqstan oblysynda Petropavl qalasynyń ákimi Marat Tasmaǵambetovke qatysty qyzmettik tergeý bastaldy, dep habarlaıdy QazAqparat tilshisi. 

Oǵan qala basshysynyń uzaq ýaqyt boıy botanıkalyq baqty basqaryp kelgen QR eńbek sińirgen agronomy Ravıl Rıazapovpen dóreki sóılesken sáti túsirilgen vıdeo sebep bolǵan. Olar jylyjaıdy qaıta qurylymdaý máselesin aıtyp, daýlasqan. Qalanyń qurmetti turǵyny men Petropavl ákiminiń daýlasyp jatqan vıdeosyn kezdesýge qatysýshylardyń biri túsirip alǵan.

Memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmeti habarlaǵandaı, tártiptik is qozǵalǵan. Faktiler rastalǵan jaǵdaıda ony ádep keńesinde qaraıdy. Petropavl ákimi qyzmetinen shettetilgen joq.

Áleýmettik jeli qoldanýshylarynyń biri qala ákimin, endi biri qala turǵynyn jaqtap, qyzý talqylap jatyr.