Petropavl ákimdiginiń eki qyzmetkeri jaýapqa tartyldy

PETROPAVL. QazAqparat – «Nur Otan» partııasy Soltústik Qazaqstan oblystyq fılıalynyń partııalyq baqylaý komıssııasy balalardyń oıyn alańyna qatysty shaǵymdy tekserip, zań buzýshylyqty anyqtady, dep habarlaıdy QazAqparat tilshisi.

«Nur Otan» partııasy SQOF baspasóz qyzmetiniń málimetinshe, Petropavl ákimdigi merdigermen balalardyń oıyn alańyn ornatýǵa qatysty kelisim baǵasyn asyryp jibergen.

«Petropavl qalasynyń turǵyndary jańadan salynǵan, biraq balalardyń oınaýyna qaýipti, ári qorshaýy men tıisti jabyndysy joq oıyn alańyna qatysty shaǵymdandy. Osyǵan oraı SQOF partııalyq baqylaý komıssııasynyń jumys toby monıtorıng júrgizdi. SQO ishki memlekettik aýdıt departamentiniń jáne «Birinshi sybaılas jemqorlyqqa qarsy medıa

ortalyq» RQB-niń SQO boıynsha fılıalynyń materıaldary negizge alyna otyra tekserý barysynda ákimdik pen «STRONG SERVIS» JShS arasynda jasalǵan kelisim «Memlekettik satyp alý týraly» zańdy buza otyra jasalǵany belgili boldy. Kelisimniń jalpy somasy 1 mln teńgege artyq bolǵan «, - deıdi «Nur Otan» partııasy SQOF ókilderi.

Partııalyq baqylaý komıssııasy osy partııanyń eki múshesin jaýapkershilikke tartýǵa usynyldy. Memlekettik satyp alýda jiberilgen zań buzýshylyqtar úshin Petropavl qalasy ákiminiń orynbasary Vladıslav Lýkın eskertý alyp, Petropavl qalasy turǵyn úı-kommýnaldyq sharýashylyǵy bólimi basshysynyń orynbasary Baqyt Ilıasov sógis aldy.

Sondaı-aq komıssııa ákimdikke balalar alańyn talapqa saı ornatýdy 1 qarashaǵa deıin aıaqtaýdy usyndy.