Petropavl ákimdigi «Halyq qatysatyn bıýdjet» jobasyn júzege asyrýda

PETROPAVL. QazAqparat – Petropavlda turǵyndardyń memlekettik qarjyny basqarý men baqylaýǵa qatysýyna baǵyttalǵan «Halyq qatysatyn bıýdjet» jobasy júzege asyrylyp jatyr, dep habarlaıdy QazAqparat tilshisi.

Petropavl qalasy ákimdiginiń málimetinshe, «Halyq qatysatyn bıýdjet» jobasy aıasynda turǵyndar negizinen aýla aýmaǵyn abattandyrý boıynsha óz ıdeıalaryn usyna alady. Jobanyń maqsaty - qala turǵyndaryn bıýdjetti qalyptastyrýǵa tartý arqyly onyń ashyqtyǵyn, qoljetimdiligin kórsetý.

Petropavl ákimdigi ótinimder men usynystardy 10 naýryzǵa deıin qabyldamaq. Turǵyndardyń qalany abattandyrýda jergilikti bıýdjet qarajatyn bólýge qatysýǵa múmkindigi bar. Ótinimmen birge petropavldyqtar kelesi sanattar boıynsha qosymsha usynystaryn bildire alady:

- aýla ishindegi aýmaqty asfalttaý;

- aýmaqty jaryqtandyrý;

- balalar oıyn alańyn jáne sport trenajerlaryn ornatý;

- aýmaqty kógaldandyrý, apatty aǵashtardy kesý;

- trotýarlardy salý jáne jóndeý;

- jalpy paıdalaný oryndaryn - saıabaqtar, skverler, jaıaý júrginshiler joldary jáne basqa nysandardy jóndeý jáne qaıta jańartý;

- qoqys konteınerlerin ornatý jáne olar úshin oryndardy belgileý;

- jalpy paıdalaný oryndarynda balalarǵa arnalǵan qurylymdardy, eresekterdiń demalysyna arnalǵan oryndyqtardy jáne ýrnalardy ornatý jáne jóndeý.

Qala turǵyndarynyń eń kóp daýysyn alǵan jobalar iske asyrylmaq. Qatysý sharttarymen qalabizben.kz saıtynda nemese 8 7152 36-29-24, jáne 109 telefondary boıynsha bilýge bolady.