Petr Poroshenko Ýkraına shekarasyn shuǵyl baqylaýǵa alý qajettigin málimdedi
14:52, 15 Maýsym 2014
ASTANA. QazAqparat - Petr Poroshenkonyń resmı ınternet-ókildiginde onyń qarýly kúshterdiń aldyna qoıǵan Ýkraınanyń memlekettik shekarasyn baqylaýǵa alý jónindegi málimdemesi jarııalandy.
«Men Ýkraına Qarýly Kúshteriniń aldyna alǵashqy kezektegi tapsyrma - terrorıster qarý, tehnıka, qosymsha kúshter, qarjy ótkizip jatqan Ýkraınanyń memlekettik shekarasyn baqylaýǵa alýdy tapsyrdym. Tek sońǵy tórt kúnniń ishinde arnaıy operatsııa sheńberinde Marıýpolde tynyshtyq ornap, zańdy tártip jolǵa qoıyldy. Memlekettik shekaranyń 248 shaqyrymy baqylaýǵa alyndy.
Lýgansk jáne Donetsk oblystary aýmaǵyndaǵy birqatar eldi mekenderde jaldamaly-sodyrlardyń is-qımyly toqtatyldy. 11 eldi meken lańkesterden tazartyldy. Sońǵy táýlikterde bizdiń el terrıtorııasyna kirýge áreket jasaǵan qarý-jaraq, oq-dári tıelgen 7 avtomobıl kolonnasy, birneshe tank pen bronetransporterler jáne ózge de atys quraldary joıyldy»,-delingen málimdemede.