Petıtsııa jazýǵa qandaı taqyryptar boıynsha tyıym salynbaq
«Petıtsııa jazýǵa shekteý qoıylǵan taqyryptardyń deni ulttyq qaýipsizdikke qatysty. Mysaly, shekara máselesi, aýmaqtyq tutastyq boıynsha nemese memlekettik tilge baılanysty bolýy múmkin. Erteńgi kúni keıbir azamattar osy tusty paıdalanyp, eldegi saıası jaǵdaıdy buzyp, separatıstik qozǵalystardy uıymdastyrýy yqtımal. Sondyqtan geosaıası máseleler men tótenshe jaǵdaılar boıynsha birqatar shekteý engizdik. Aıtar bolsaq, qańtar oqıǵasy sııaqty kenetten elde qandaı da bir jaǵdaı bolsa, keıbir azamattar petıtsııa arqyly tótenshe jaǵdaı rejımin alyp tastaýdy talap etýi múmkin», - dedi Edil Jańbyrshın «Amanat» partııasy alańynda ótken baspasóz máslıhatynda.
Májilis depýtatynyń aıtýynsha, ult qaýipsizdigine qatysty máseleni petıtsııa arqyly sheshý múmkin emes. Onyń málimetinshe, petıtsııa týraly zań qazir Senattyń qaraýynda.
«Jalpy zańǵa ózgeris engizý ońaı emes. Tyıym salynǵan taqyryptardyń aıasyn keńeıtý aldymen talqyǵa túsedi. Depýttar kóringen normany ótkizbeıdi. Ondaı másele týyndaǵan jaǵdaıda jumys toby qurylyp, depýtattar, qoǵam belsendileri, sala mamandarynyń qatysýymen talqylanady. Eger qoǵam qarsy bolsa, onda zańǵa ózgerister engizilmeıdi. Ózderińiz bilesizder, keıbir rezonans týdyrǵan zań jobalary Senat, Prezıdent aldynan qaıtarylyp jatady», - deıdi halyq qalaýlysy.