Petıtsııa memorganda qaralýy úshin halyqtan qansha daýys jınalýy tıis

ASTANA. QazAqparat – Májilis depýtaty Erlan Saıyrov Jibek Joly telearnasynyń Májilistegi mobıldi stýdııasynda bergen suhbatynda petıtsııa jasaýdyń talaptaryn túsindirdi, dep habarlaıdy QazAqparat tilshisi.

«Eger el kólemindegi aýqymdy másele bolsa, onda petıtsııa shyǵarý úshin kem degende 50 myń daýys jınalýy kerek. Oblystyq deńgeıdegi problema bolsa, onda sol óńir halqynyń 2% daýysy bolýy tıis. Al tek oblys ákimdigine qatysty másele týyndasa ol jaǵdaıda óńir turǵyndarynyń 1% daýysy talap etiledi», - dedi Erlan Saıyrov suhbat barysynda.

Onyń aıtýynsha, tıisti daýys jınaǵan petıtsııany memlekettik quzyrly organdar qaraıdy.

«Eger petıtsııa shyǵarýǵa daýys jetpegen jaǵdaıda, atalǵan másele halyqtyń ótinishi retinde quzyrly organdarmen mindetti túrde qaralyp, oǵan naqty jaýap berilýi tıis. Petıtsııa elektrondy jáne qaǵaz túrinde qabyldanady. Elimizdiń kóptegen aýylynda ınternet qoljetimsiz, onyń jasyratyny joq. Petıtsııany tek elektrondy túrde qabyldasa, ınternet joq eldimeken turǵyndarynyń oǵan qatysa almaý qaýpi bar, sondyqtan qaǵaz túrinde berýge ruqsat», - deıdi ol.

Buǵan deıin Erlan Saıyrov qoǵamdyq baqylaý týraly zańǵa qatysty depýtattyq oıyn aıtyp, zańnyń keıbir tustaryn túsindirip ótken edi.