Peshti jylytý maýsymyna qalaı daıyndaý kerek – qutqarýshylar keńesi

ÓSKEMEN. QazAqparat – Shyǵys Qazaqstan oblysynyń qutqarýshylary jurtshylyqqa peshti jylytý maýsymyna qalaı daıyndaý kerektigin túsindirip, úı-úıdi aralap júr, dep habarlaıdy QazAqparat tilshisi.

ShQO Tótenshe jaǵdaılar departamentiniń qyzmetkerleri jylytý maýsymyna daıyndyq jumystaryn shilde aıynan bastap ketken. Jumystyń negizgi baǵyty – jer úıde turatyn áleýmettik turǵyda osal toptaǵy halyq arasynda profılaktıkalyq sharalar júrgizý, órt shyǵý qaýpin azaıtý. Oblys aýmaǵynda osy sanattaǵy otbasylardyń 3574-i pesh jaǵady.

«Qazirgi ýaqytta qutqarýshylar jergilikti atqarýshy organ ókilderimen birlesip, bul úılerdiń 91 paıyzyn aralap shyqty. 3574 adamnyń 2873-i úıine kirgizip, tekserý jasatty. Bul jalpy sannyń 80 paıyzy», - deıdi oblystyq TJD bastyǵynyń orynbasary Serik Amangeldın.

Áleýmettik turǵyda osal toptaǵy 2873 otbasynyń úıinen órt qaýipsizdigi talaptary buzylǵan 535 úı anyqtaldy. Jyl basynan beri óńir boıynsha kómirtegi totyǵymen 22 adam ýlanǵan.

Osy rette, departament qyzmetkerleri halyqqa peshti jylytý maýsymyna qalaı daıyndaý kerektigin túsindirdi.

«Pesh pen murja sylanǵan, aqtalǵan bolýy qajet. Qubyrlar, murjalar jáne jylytý peshiniń basqa da bólikteri kúıeden úsh aıda bir ret tazalanýy tıis. Al úzdiksiz jumys isteıtin peshter bolsa, eki aıda bir ret tazartasyz. Pesh jaqqan kezde ruqsat etilmeıdi:

- janyp jatqan peshti qaraýsyz qaldyrýǵa jáne ony qadaǵalaýdy balalarǵa tapsyrýǵa;

- peshti jaǵý úshin tez tutanatyn jáne janǵysh suıyqtyqtardy qoldanýǵa;

- pesh pen tútin murjalarynyń betinen 0,5 metrden az qashyqtyqta janǵysh zattar men materıaldardy (aıaq kıim, kıim) keptirýge;

Peshti únemi tekserip, sańylaýy bolsa bitep tastaǵan abzal.