Pesh jaqqanda kómirtegi totyǵyna ýlanbas úshin qandaı qaýipsizdik erejelerin saqtaý kerek
Oblystyq Tótenshe jaǵdaılar departamenti baspasóz qyzmetiniń málimetine súıensek, ótken jyly peshten bólinetin qaýipti gazdan 14 adam, onyń ishinde 7 bala zardap shekti. Barlyq oqıǵa turǵyndar uıyqtap jatqanda bolǵan.
«7 jaǵdaı - peshte jaryq bolýynan, 5 - tútin murjasynyń tazartylmaǵanynan, 2 - peshtiń tútin tartýy bolmaýy sebebinen tirkeldi. Bıylǵy jylytý maýsymynda kómirtegi totyǵynan 10 adam ýlanǵan. Sońǵy oqıǵa ótken demalys kúni Óskemen qalasynda bolǵan. Jaryǵy bar pesh paıdalanylǵan úıde 1950 jyly týǵan áıel jáne 1955 jylǵy er adam ýlanyp, aýrýhanaǵa jatqyzyldy», - delingen aqparatta.
Ýly gaz birden tynys alý júıesi arqyly denege enip, ókpeden qan aınalymy júıesine ótedi. Onda gemoglobınmen aralasqannan keıin qan ottegin tasymaldaý jáne ony tinderge jetkizý qabiletin joǵaltady. Sonyń saldarynan eń áýeli mı zardap shegedi.
Osy rette, qutqarýshylar halyqqa pesh jaqqanda kómirtegi totyǵymen ýlanbas úshin qandaı qaýipsizdik erejelerin saqtaý kerektigin túsindirip ótti.
- Peshti 3 aıda keminde 1 ret tazalaý kerek.
- Janyp jatqan peshti qaraýsyz qaldyrýǵa, ony qadaǵalaýdy balalarǵa tapsyrýǵa bolmaıdy.
- Pesh jaqqan kezde tez tutanatyn suıyqtyqtardy qoldanbańyz.
- Pesh pen tútin murjasynyń betinen 0,5 metrden kem qashyqtyqta janǵysh zattar men materıaldardy keptirmeńiz.
- Jeldetý jáne gaz arnalaryn tútin murjasy retinde paıdalanýǵa bolmaıdy.
- Aqaýlary men jaryqtary bar peshti paıdalanbańyz.