Pesh pen murjany ýlanyp qalmaý úshin qanshalyqty jıi tazartý kerek

ÓSKEMEN. QazAqparat – Shyǵys Qazaqstan oblysynyń qutqarýshylary kómirqyshqyl gazymen ýlanyp qalmas úshin pesh pen murjany qanshalyqty jıi tazartý kerektigin túsindirdi, dep habarlaıdy QazAqparat tilshisi.

ShQO TJD baspasóz qyzmetiniń málimetine súıensek, óńirde jylytý maýsymy bastalǵaly beri pesh jaǵyp otyrǵan jer úılerde 80-ge jýyq órt boldy. Kómirtegi totyǵynan 13 adam ýlanyp, aýrýhanaǵa jatqyzylǵan. Osy rette, qutqarýshylar pesh pen tútin murjasyn qanshalyqty jıi tazalaý qajettigin túsindirdi.

«Qazaqstan Respýblıkasynyń órt qaýipsizdigi qaǵıdalaryna sáıkes, tútin murjalary men peshterdi tazartý jylytý maýsymy bastalǵanǵa deıin jáne úsh aıda bir ret júrgizilýi tıis. Jalpy murja pen peshtiń tazalaýdy qajet etetinin túsiný asa qıyn emes. Tútin murjasy bitelip qalǵandyǵyn, ot jaqqan kezde jalynnyń nashar tartylýynan nemese ózdiginen sónýinen baıqaýǵa bolady. Sondaı-aq peshtegi jalynnyń túsi qyzǵylt sary bolyp, ot janǵanda jaǵymsyz ıis sezilýi múmkin. Peshti ákpen únemi aǵartyp otyrý qajet. Aq fonda tútin shyǵyp jatqan qaýipti jer birden kórinedi», - deıdi departamenttiń memlekettik órt baqylaý basqarmasynyń bastyǵy Nurjan Ómirjanov.

Qutqarýshylar bıylǵy jylytý maýsymynda qaýipsizdik maqsatynda 168 000 úıdi aralap shyqty. Nátıjesinde, jylytý júıelerin paıdalaný kezinde órt qaýipsizdigi talaptaryn buzýdyń 21 000 faktisi tirkeldi. Mamandardyń túsindirý jumystarynyń arqasynda pesh jaǵyp otyrǵan 7900-den astam úıde buzýshylyqtar joıyldy.