Perzentin Alataý-Tamshybulaq ataǵan Ulybrıtanııa jazýshysy týraly kitaptar qazaq tiline aýdaryldy

TALDYQORǴAN. QazAqparat - Qapal Arasanda tuńǵysh perzenti dúnıege kelgen ulybrıtanııalyq saıahatshy, jazýshy Tomas Ýıtlam Atkınson týraly kitaptar qazaq tilinde jaryq kórdi, dep habarlaıdy QazAqparat tilshisi.

Búgin Almaty oblysy ákiminiń orynbasary Batyrjan Baıjumanov Ulybrıtanııa jáne Soltústik Irlandııa Birikken Koroldiginiń jazýshylary – Djon Massı Stıýarttyń «Tomas, Lıýsı jáne Alataý: Atkınsondardyń Sibir men qazaq dalasyndaǵy oqıǵalary» jáne Nık Fıldıngtiń «Uly dala saıahatshylary» kitaptarynyń resmı tusaýkeserine qatysty.

Eki basylym da qazaq tiline aýdarylǵan.

Igi shara Qazaqstan Táýelsizdiginiń 30 jyldyǵy merekesine oraı uıymdastyryldy. Joba QR Tuńǵysh Prezıdenti - Elbasy N.Á. Nazarbaevtyń «Bolashaqqa baǵdar: rýhanı jańǵyrý» baǵdarlamasy «Jańa gýmanıtarlyq bilim. Qazaq tilindegi 100 jańa oqýlyq» aıasynda júzege asty.

Sharaǵa qos kitaptyń avtorlary onlaın qatysty. Sondaı-aq Qazaqstannyń Ulybrıtanııa jáne Soltústik Irlandııa Qurama Koroldigindegi tótenshe jáne ókiletti elshisi Erlan Ydyrysov óz lebizin bildirdi.

Ulybrıtanııalyq ǵalym Tomas Ýıtlam Atkınson Jońǵar Alataýyn jáne Tamshybulaqty erekshe zerttegen. Tamshybulaqtyń sulýlyǵyna tánti bolǵany sonshalyq, Tomas pen Lıýsı qazaq jerinde dúnıege kelgen tuńǵysh uldarynyń esimin Alataý-Tamshybulaq dep qoıǵan. Búginde bul esim Anglııadaǵy úlken bir áýlettiń tegine aınalyp otyr. Qazaq dalasyna tabany tıgen saıahatshynyń altynshy urpaǵy - Pıpa Alataý-Tamshybulaq hanym qazirgi tańda London mańyndaǵy eldi mekenderdiń birinde turady.

Búginde dál osy Atkınsonnyń urpaqtary Tamshybulaqqa Ulybrıtanııadan arnaıy kelip, atalarynyń kindik qany tamǵan jerdiń aýasymen tynystap, saıahat jasaýdy dástúrge aınaldyrǵan.