«Perzent qaryzy jáne Prezıdent paryzy» - baspasózge sholý
***
«Bodan eldiń bostan bolýy ońaı emes. Al ony ustap turý, bekemdeý, baıandy etý odan da qıyn. Adamzat tarıhynda basy buǵaýǵa túspegen elder sırek, kóbi bodandyqta bolyp, azattyq alǵan elder. Azattyq alǵanymen, bodandyq qamytyn moınynan birjola sypyryp tastaı almaı júrgen elder de kezdesedi. Bulardyń qaı-qaısysyn alsaq ta, úırenerimiz de, úlgi alar tustarymyz da jeterlik», dep jazady Halyqaralyq «Qazaq tili» qoǵamynyń prezıdenti, akademık Ómirzaq Aıtbaıuly « Egemen Qazaqstan » gazetiniń senbilik sanynda jaryq kórgen « Perzent qaryzy jáne Prezıdent paryzy » atty maqalasynda. Avtordyń atap ótýinshe, ana tiliniń adam ómirindegi, el taǵdyryndaǵy orny men mańyzynyń qanshalyqty zor ekendigin elimizdiń árbir azamaty, ásirese, is basyndaǵy atqaminerlerimiz Elbasydaı túsinip, sol kisishe áreket etse, búginde ózimiz qoldan jasap júrgen kóptegen kedergilerdiń biri de bolmas edi. «Elbasy aıtqandaı, «Ana tilin ardaqtaý - eshqashan eskirmeıtin uran». Sondyqtan Ana tiliniń aıbaryna aınalǵan Elbasy Nursultan Nazarbaevtyń osynaý ustanymy Qazaqstannyń árbir azamatynyń betke ustar temirqazyǵy bolýǵa tıis dep bilemin», dep jazady Ó.Aıtbaıuly.
Búgin el gazeti « Egemen Qazaqstanda » « Lıder » degen taqyryppen shetel prezıdentteri, Úkimet basshylary, kórnekti saıası jáne din qaıratkerleriniń Elbasy Nursultan Nazarbaev týraly aıtqan pikirleri berildi. Máselen, Reseı Federatsııasynyń Prezıdenti Vladımır Pýtın «Siz ıntegratsııalyq úderisterde, ásirese, onyń eń mándi nysandary men túrleri boıynsha sózsiz kóshbasshysyz. Qazaqstannyń qol jetkizgen tabystary Sizdiń atyńyzben tikeleı baılanysty. Sizdiń eńbegińizdi óz otandastaryńyz ǵana emes, mıllıondaǵan reseılikter de shynaıy qurmet tutady», deıdi. QHR Tóraǵasy Sı Tszınpın: «Azııadaǵy ózara is-qımyl jáne senim sharalary jónindegi keńestiń bastamashysy - Nursultan Nazarbaev. Biz onyń úlken saıası kóregendigi men aımaqtyq qaýipsizdik pen álemdegi beıbitshilikti qamtamasyz etýdi óziniń paryzy sanaıtyn qasıetine tántimiz», deıdi. AQSh Prezıdenti Barak Obama da Qazaqstanǵa Aýǵanstandaǵy jaǵdaıǵa baılanysty naqty ustanymy úshin rızashylyq bildirip, Elbasymyzdyń ultaralyq jáne dinı tózimdilikti ilgeriletýdegi kúsh-jigerin joǵary baǵalaıtyndyǵyn bildirgen.
***
« Aıqyn » gazetiniń búgingi sanynda «Astana Opera» memlekettik opera jáne balet teatrynyń dırektory, Qazaqstannyń eńbek sińirgen qaıratkeri, Memlekettik syılyqtyń ıegeri Tólegen Muhamedjanovpen aradaǵy suhbat «Astana Opera» teatrynyń bas sáýletshisi - Elbasy» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Saryarqa tórinde boı kótergen biregeı ǵımarat Elbasynyń tikeleı bastamasymen salyndy. Alǵashqy kirpishi qalanǵan sátten bastap, qurylys jumysy aıaqtalǵansha jeke baqylaýyna alyp, muqııat qadaǵalap otyrdy. Resmı ashylýyna deıin Ult Kóshbasshysy óziniń «Qazaqstan - 2050» strategııasyn osy sahnadan jarııalaǵan edi. Dál osy 2012 jyldyń 14 jeltoqsany bizdiń teatrdyń jylnamalyq shejiresine altyn áriptermen jazyldy. Al 2013 jylǵy 21 maýsymda Memleket basshysy saltanatty túrde tusaýyn kesip, óner oshaǵyn el ıgiligine usyndy», deıdi. Onyń paıymynsha, bul teatr sánge turǵyzylǵan joq. Kez kelgen adamnyń qalaǵan ýaqytynda kelip, qoıylymdardy tamashalaýyna bolady. Bılet baǵasy 500 teńgeden bastalady. Álemdik teatrlardyń aldyńǵy oryndary 500 evro bolsa, bizde ázirge 30 myń teńge. «Aldaǵy ýaqytta ósýi de múmkin. Biraq qalaı bolǵanda da óner - halyqtiki emes pe? Sondyqtan bılet baǵasy eldiń qaltasyna oraıly bolý kerek dep esepteımin», dedi T.Muhamedjanov.
Memleket qurý qamynda júrse de Elbasy Nursultan Nazarbaev qazaqtyń namysyn sózben qaıraı bildi. Úkilegen úmitin oıatty. Qazaqtyń tarıhy, mádenıeti Táýelsizdikke qyzmet etsin degen nıetpen qıyn da kúrdeli kezeńde el-jurtqa shynaıy Kóshbasshy bola bildi. Elbasynyń ár kezderi aıtyp júrgen eldik, memleketshildik, mádenıet pen rýhanııat qaınary týraly oılary - osynyń dáleli. Búgin « Aıqyn » gazetinde Memleket basshysynyń « Tarıh tolqynynda » atty eńbeginen úzindiler berildi. Máselen, QR Prezıdentiniń paıymynsha, túptep kelgende, kóptegen qarapaıym qazaqtyń óz tegine den qoıýy qazaq ultynyń tól bolmysyna tán tanymǵa degen ińkárligine baılanysty. Mundaı ińkárlik azat memleket aıasynda odan ári damyp, ártúrli qıyndyqtarmen betteskende kim-kimniń de parasat-paıymyna baǵdarshy bolyp otyrýǵa tıis. «Mádenıet zertteýshileriniń ózderine tán kásibı sóz oramdary bar, sondaı sóz oramdarynyń biri mádenıettiń ekpini dep aıtylady. Muny qarapaıym tilge keltirip aıtqanda, dástúrdiń, tolǵamnyń, ádettiń, t.b. sabaqtastyǵy degendi bildirer edi. Shynynda da, «Qarakózdi» bilmegen, dombyra únine uıymaǵan, jýsandy dalanyń ıisin ańsamaǵan qazaqty qazaq dep aıtýdyń ózi qıyn-aý. Jalpyulttyq mádenı qundylyqtardyń osynaý tetigi, ıaǵnı «sezim quraly» árqashanda, ár jerde de, ár halyq bolmysy men ár urpaq boıynda da udaıy sabaqtasyp otyrady. Munsyz «ulttyq daralyq» ta, ulttyń ózi de bolmaq emes», deıdi Elbasy.
***
« Kazahstanskaıa pravda » gazetiniń jazýynsha, Elbasy Nursultan Nazarbaev TMD elderi Qorǵanys mınıstrleri keńesiniń otyrysyna qatysýshylarmen kezdesti. Júzdesý barysynda Memleket basshysy TMD elderiniń qorǵanys vedomstvolary basshylarynyń turaqty kezdesýleriniń mańyzdylyǵyn atap ótti. «Bizdiń memleketterimizdiń birlesken tájirıbesi, adamı baılanystar, ortaq bilim berýdiń áskerı salany da qamtyǵan ortaq úrdisi, qarý-jaraqtyń biryńǵaı túrimen jabdyqtaý, sondaı-aq syrtqy shekaralardy qorǵaýdyń ortaq keńistigi - osynyń bári tyǵyz baılanystardy budan ári de saqtaý qajettigin bildiredi», - dedi Qazaqstan Prezıdenti.