Perýashevtiń jataqhanalar salý ıdeıasyn Úkimet qup kórmedi
Mınıstrliktiń málimetteri boıynsha, turǵyn úı baǵdarlamalary úshin («Qoljetimdi baspana» jáne ózegeleri) dálizdik sanattaǵy jobalardy jasaqtaý arqyly turǵyn úı nysandarynyń tıpologııasy keńeıtilgen.
Dálizdik sanattaǵy turǵyn úıler sektsııalyq úılerge qaraǵanda, qurylys shyǵyndaryn ortasha eseppen 7-11 protsentke azaıtady. Kireberis aýmaǵyn kemitýdiń arqasynda turǵylyqty aýmaq 6,6 protsentke ulǵaıady.
«Dárethana men asúıi joq turǵyn úılerge keletin bolsaq, onda kóp adam turatyndyqtan, kóptegen kemshilikteri de bar: jalpy qoldanystaǵy bólmelerde (dárethana, asúı, jýynatyn bólme) sanıtarlyq jaǵdaıdyń tómendigi, aıqaı-shý jáne taǵy basqa yńǵaısyzdyqtar bolady», - dep atap ótti vıtse-mınıstr Roman Sklıar atalmysh úılerdiń ekonomıkalyq tıimdiligine qatysty jaýabynda.
Degenmen onyń sózinshe, mundaı jobalar QR Bilim jáne ǵylym mınıstrligi arqyly elorda stýdentteri úshin júzege asyrylyp keledi. Olardyń qurylysy memlekettik-jekemenshik seriktestik arqyly jumys berýshilerdiń qarjysyna salynady.
Mınıstrlikten habarlaǵandaı, «Nurly jol» baǵdarlamasynda jataqhana salý boıynsha jeke baǵyt qarastyrylmaǵan.
Aıta keteıik, Azat Perýashev depýtattardyń plenarlyq otyrysynda «Nurly jer» baǵdarlamasy boıynsha dárethanasyz jáne asúısiz páter salýdy usynǵan bolatyn. Sol arqyly bólmeler aýdany únemdelip, arzan baspanamen qamtý jumysy jandanady dep esepteıdi depýtat.
Perýashevtiń esepteýinshe, jeke ájethana men asúıden bas tartý arqyly turǵyn úı qurylysynda úıdiń baǵasyn 40 paıyzǵa tómendetýge bolady.
«Mundaı jataqhanalardyń uıymdastyrylǵan qurylysy qazaqstandyqtardy úımen qamtamasyz etýdi arttyrady. Eger «Nurly jer» baǵdarlamasymen 2021 jylǵa deıin 35 myń páter salý josparlansa, dál sol aýdanǵa jataqhana salý arqyly, 49 myń otbasyny úımen qamtýǵa bolar edi», - dep atap ótti Azat Perýashev.
Sonymen qatar, ol úkimetke aýyl jastaryna arnalǵan jataqhanalar keshenin salýdy da usyndy. Sebebi, baspanasyz júrgenderdiń kóbi qalaǵa kelgen aýyl jastary.
«Kez kelgen bazar men qurylys mańynda sanıtarlyq emes talaptarda ómir súretinder - aýyldan kelgen jastar. Olar 10-15 adam bolyp páter nemese jataqhanadan bólme jaldaıdy», - dedi Májilis depýtaty.
Azat Perýashev resmı kórsetkish boıynsha, úsh aıda ýaqytsha tirkeýden ótken 690 myń mıgrant baryn da aıta ketti. Onyń aıtýynsha, aýyldan qalaǵa kóship kelgender sany 2,5-5 mln adamǵa jýyq.
«Іshki mıgranttardyń turǵyn úı máselesin sheshý úshin qosymsha qural qajet. Mundaı quraldy jeke tulǵalar burynnan paıdalanyp keledi. Olar 15-20 sharshy metrlik bólemeleri bar jáne sanıtarlyq bólimderi ortaq shaǵyn jataqhanalar salady. Tek Astananyń ózinde jeke turǵyn úı retinde salynǵan ondaǵan jataqhana bar», - dep sózin aıaqtady ol.
Eske salsaq, buǵan deıin 2017 jyly «Nurly jer» baǵdarlamasy boıynsha, 100 myń páter jalǵa beriledi dep josparlanǵan. 2017-2031 jyldar aralyǵynda barlyǵy 1,5 mln otbasyǵa arnalǵan turǵyn úıler salynady.
Qazirgi ýaqytta, jergilikti atqarýshy organdardyń málimetinshe, 2017 jyldyń 1 qańtaryndaǵy jaǵdaı boıynsha, elimizde 428 350 azamat páter kezeginde tur.