Perýashev: «Aq jol» Prezıdenttiń konstıtýtsııalyq reformasyn joǵary baǵalaıdy
Búgin QR Parlamenti palatalarynyń birlesken otyrysynda Májilis depýtaty Azat Perýashev osylaı málim etti, dep habarlaıdy QazAqparat.
«Qazaqstan óz Táýelsizdiginiń jańa kezeńin teńdessiz konstıtýtsııalyq reformadan bastap otyr. Elbasymyz osy reforma sheńberinde alpysqa jýyq ókilettiginen bas tartyp, olardy bıliktiń túrli tarmaqtaryna bekitip berýdi usynýda. Elbasymyzdyń eshqandaı daý týǵyzbaıtyn bılik fýnktsııalaryn óz erkimen berý faktisiniń ózi erekshe jaǵdaı. Menińshe, búgingi álemde buǵan uqsas mysaldar joq. Kerisinshe, bılik basyna kelgen adamdar búkil basqarý tizginin óz qolyna jınaýǵa umtylady»,-dep toqtaldy A. Perýashev.
Osy oraıda depýtat zamanaýı qazaq memleketiniń negizin qalaýshy, Elbasy Nursultan Nazarbaev bizdiń ata-babalarymyzdyń asqaq armanyn is júzine asyryp, keń-baıtaq jerimizdiń irgesin bekitkenin, ultymyzdyń basyn biriktirip, tolyqqandy memlekettik ınstıtýttar, qýatty ekonomıka qurǵanyn, halqymyzǵa «Máńgilik el» ulttyq ıdeıasyn bergenin atap ótti.
«Únemi ulttyq múdde úshin, parlamentarızm men bıznesti qoldaý bastamalaryn kóterip kele jatqan «Aq jol» partııasy Prezıdenttiń konstıtýtsııalyq reformasyn joǵary baǵalaıdy jáne Nursultan Nazarbaevtyń tarıhı yqtııaryna alǵysyn aıtady»,-dedi ol.
Sonymen qatar Perýashev birlesken otyrys barysynda sóz sóılegen depýtat Hamenova men basqa da áriptesteriniń Táýelsizdiktiń qalyptasýynda Qazaqstannyń Tuńǵysh Prezıdentiniń atqarǵan aıryqsha róli men mártebesin Konstıtýtsııada bekitýdi usynǵanyna aıta kele, «Biz áriptesterimizdiń usynysyn qoldaımyz jáne ony búginde ózekti ári negizdelgen qadam dep sanaımyz»,-dedi.