«Perekrestok» teleserıalynyń jańa nusqasy shyǵady

ASTANA. 11 qarasha. QazAqparat - Kelesi jyldan bastap qazaqstandyq kórermenderdiń súıikti telehıkaıasy bolǵan «Perekrestok» serıalynyń jańa nusqasy shyǵady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Mádenıet jáne aqparat mınıstri Muhtar Qul-Muhammed málim etti.

Mınıstrdiń habarlaýynsha, 90-jyldary qazaqstandyq kórermenniń kózaıymyna aınalǵan «Perekrestok» teleserıaly aǵylshyndardyń bastamasymen túsirilgen bolatyn. Sol kezde atalǵan joba TMD elderi boıynsha eń úzdik telehıkaıa dep tanyldy. «Ókinishke qaraı, biz sonymen sátti bastap, keıingi ýaqytta kósh sońynda qaldyq. Sol serıalǵa túsken Bıken Rımova, Qasym Jákibaev, Saǵı Áshimov sııaqty kóptegen tanymal ártister aramyzda joq bolsa da, olardyń tamasha obrazdary qaldy», - deıdi M.Qul-Muhammed. Mınıstr atap kórsetkendeı, búginde «Perekrestoktyń» rejısseri Ermek Shynarbaev serıaldyń jańa nusqasyn túsirýge kelisti. Onyń shartty ataýy «Astanadaǵy jol qıylysy» («Perekrestok Astany») bolmaq. Kelesi jyldan bastap telehıkaıany túsirý jumysy bastalady. Al jyldyń ortasynda ol kórermenge jol tartpaq.