Penjimde selden zardap shekken otbasynyń ár múshesine 30 myń teńgeden berildi

TALDYQORǴAN.QazAqparat - Bolat Ótemuratov qorynyń demeýshiligimen birlesip «Qyzyl aı» qoǵamdyq uıymy 3 maýsym kúngi sý tasqynynan zardap shekken 176 otbasynyń ár múshesine 30 myń teńgeden qarjylaı kómek kórsetti, dep habarlaıdy QazAqparat tilshisi.

Atalǵan qoǵamdyq uıymnyń qarjy dırektory Maqsat Áldıshevtiń aıtýynsha qarajat arnaıy jasalǵan bank kartalaryna tolyqtaı aýdarylǵan.

«Turǵyndar úsh aıdyń ishinde kez kelgen ýaqytta aqshalaryn ala alady. Biz árbir otbasynyń jaǵdaıymen jeke-jeke tanysyp, januıa músheleriniń qujattaryn tolyqtaı túgendedik. Nátıjesinde 176 otbasynyń 936 múshesiniń barlyǵyna kómektestik», - dedi M. Áldıshev.

Bir otbasynda 12 adam bar Kerembekovtar áýleti de osy kómek alǵandardyń qatarynda. Aıtyp kelmeıtin apatta el bolyp qol ushyn sozyp jatqanqan qaıyrymdy jandarǵa dán rıza.

«Qazir barlyǵy qalpyna keldi. Basymyz aman, qazan-oshaǵymyz bútin», - deıdi úı ıesi.

Panfılov aýdany ákimdiginiń málimetinshe, búgingi tańda úılerine sý kirgen 31 úıge 15 mıllıon teńge kóleminde shyǵyn eseptelip, bıýdjetten qarastyrylýda. Aýlalaryna sý kirgen otbasylarǵa qajetine qaraı jergilikti kásipkerler qurylys materıaldaryn berip kómektesip jatyr.

Eske sala ketsek, 3 maýsym kúni keshkisin Penjim aýylynda aýa temperatýrasynyń kóterilýi men jaýyn-shashyn saldarynan sel júrgen bolatyn. Selden 270 úıdiń aýlasyn sý basty.