Pensılvanııa sýdıasy Ilon Maskke saılaýshylarǵa 1 mln dollardan taratýǵa ruqsat berdi

<p>ASTANA. KAZINFORM &ndash; Ilon Masktyń saılaýshylarǵa kúndelikti mıllıon dollardan taratýy seısenbi kúni ótetin saılaý qarsańynda Fıladelfııa okrýgi prokýrorynyń sot protsesinen aman qaldy. Saılaý úshin mańyzdy Pensılvanııa shtatynyń sýdıasy ony toqtatýdan bas tartty, dep habarlaıdy <a href="https://www.bloomberg.com/news/articles/2024-11-04/musk-1-million-voter-giveaway-can-proceed-after-lawsuit?srnd=homepage-europe" target="_blank" rel="noopener">Bloomberg.</a></p>

Pensılvanııa sýdıasy Andjelo Foletta dúısenbide prokýrordyń zańsyz lotereıa dep ataǵan mıllıon dollar taratýdy toqtatý týraly ótinishin qabyldaǵan joq. Bul sheshim Masktyń advokaty baıqaýdyń jeńimpazdary kezdeısoq tańdalmaıtynyn aıtqan tyńdaýdan keıin qabyldandy.

Donald Trampty jaqtap júrgen Masktyń PAC komıteti sóz bostandyǵy men qarý quqyǵyn qoldaıtyn petıtsııaǵa qol qoıǵandarǵa 5 qarashadaǵy saılaý kúnine deıin kún saıyn 1 mln dollar taratyp otyr. Jeńimpaz qubylmaly shtattardyń birinde tirkelýi tıis. Bul rette baıqaý belgili bir úmitkerdiń qoldaýyn qajet etpeıdi.

Ótken aptada Fıladelfııa okrýginiń prokýrory Larrı Krasner Mask pen PAC-qa qarsy sotqa shaǵym túsirip, sottan Fıladelfııa turǵyndaryn mıllıon dollar utyp alý múmkindigi úshin jeke aqparattaryn ashýǵa jáne jeńiske jetý múmkindiginiń ornyna saıası ýádeler berýge shaqyratyn «zańsyz lotereıany» toqtatýdy talap etti.

Dúısenbide Masktyń advokaty Krıs Gobert tyńdaýda bul baıqaý lotereıa emes, óıtkeni jeńimpazdar kezdeısoq tańdalmaıtynyn aıtty. Onyń aıtýynsha, jeńimpazdar Masktyń saıası komıtetiniń qoǵamdyq ókilderi retinde «jaramdylyǵyna» qaraı tańdalyp otyr.

5 qarashada ótetin prezıdenttik saılaýda Donald Trampty belsendi túrde qoldap júrgen mıllıarder Ilon Mask «qubylmaly» shtattarda tirkelgen saılaýshylarǵa sóz bostandyǵyn qoldaıtyn petıtsııaǵa qol qoıǵany úshin aqsha tólegendi jón kórdi. 

Bul bastama zańgerler arasynda suraq týdyrdy. Biraq olar «Bul zańdy álde zańsyz ba?», «Mask zańdarda aıla paıdalanyp jatyr ma?» degen suraqtarǵa bir jaýap tapqan joq.

Aıta keteıik, X áleýmettik jelisiniń ıesi Ilon Mask saılaýaldy jıynǵa jınalǵandardy 5 qarashada ótetin saılaýda Trampty qoldaýǵa shaqyrdy.

Mask Trampty qoldaý komıtetine keminde 75 mln dollar bóldi.