Pedofıldi ustaǵan qaraǵandylyq polıtseıler marapattaldy

QARAǴANDY. QazAqparat – Qaraǵandyda qyzmet barysynda erlik kósetken jáne jedel áreket etken bes polıtseı madaqtaldy, dep habarlaıdy QazAqparat tilshisi.

Oblystyq Polıtsııa departamentiniń bastyǵy Erlan Faızýllın Qaraǵandy qalasy ІІB patrýldik polıtsııa polkiniń bes qyzmetkerin kórsetken erlikteri úshin marapattady.

«Sizderdiń barlyqtaryńyz joǵary kásipqoılyq, qaısarlyq kórsetip, sanaýly mınýttarda oqıǵa ornyna kelip, adam ómirin saqtap qaldyńyzdar, sondaı-aq kúdiktini jedel túrde ustadyńyzdar. Biz, departament basshylyǵy áriptesterimizdiń is-áreketterin joǵary baǵalaımyz», - dep atap ótti Erlan Faızýllın patrýldik polıtsııa polkiniń jeke quramynyń aldynda.

Polıtsııa aǵa serjanty Aıtqalı Aqjol, polıtsııa kishi serjanty Saılaý Nurlybek, polıtsııa serjanty Sembekov Madı, polıtsııa leıtenanty Myrzambekov Darhan, polıtsııa serjanty Arǵyn Aqnıet qol saǵattaryna ıe boldy. Sondaı-aq barlyq qyzmetkerge 150 myń teńge kóleminde aqshalaı syıaqy berildi.

Esterińizge sala keteıik, aǵymdaǵy jyldyń 7 jeltoqsanynda saǵat 10:30 shamasynda «102» telefonyna qala turǵyny habarlasyp, kópqabatty úılerdiń kireberisinde belgisiz er adam onyń 7 jasar qyzyna tıiskenin aıtqan. Oqıǵa ornyna dereý polıtsııa narıady jiberildi. Polıtseıler Myrzambekov Darhan, Arǵyn Aqnıet jaqyn jatqan aýdandarǵa kúdiktini anyqtaýǵa baǵyttalǵan. Jedel-izdestirý sharalary barysynda olar 43 jastaǵy qala turǵynyn ustady.

Atalǵan fakti boıynsha QR QK 24-120-baby 4-bóligi boıynsha sotqa deıingi tergeý bastaldy. Ustalǵan azamatqa qatysty «qamaýǵa alý» túrindegi bultartpaý sharasy taǵaıyndaldy.

Sondaı-aq, aǵymdaǵy jyldyń 3 jeltoqsanynda saǵat 21:00 shamasynda Qaraǵandy qalasynyń ІІB jedel basqarý ortalyǵynyń «102» telefonyna 15-shaǵynaýdanyndaǵy garaj massıvinde er adam ózine-ózi qol salmaq bolǵany týraly habarlama túsken. Oqıǵa ornyna aýdandy patrýldeýge kirisken jaıaý narıad kelip jetti. Polıtseıler er adamdy izdeı bastap, garajdardyń biriniń janynan júgirip ótken kezde, ashyq esikti baıqap, ishke kirgen. Onda arqanǵa asylyp turǵan er adamdy baıqaǵan. Ony sheship alyp, alǵashqy medıtsınalyq kómek kórsetken.

Aıta ketý kerek, táýlik saıyn qoǵamdyq tártipti saqtaýǵa jáne jol qaýipsizdigin qamtamasyz etýge patrýldik polıtsııa polkiniń 300-ge jýyq qyzmetkeri kirisedi. Kún saıyn 300-den astam ákimshilik quqyqbuzýshylyq anyqtalyp, qylmystar izin sýytpaı ashylyp jatady.