«Pedofılderge qarsy úkimettik baǵdarlama ázirlenýi múmkin» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 12 maýsym, juma kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Pedofılderge qarsy úkimettik baǵdarlama ázirlenýi múmkin» dep jazady «Aıqyn» basylymy. Elimizdegi balalarǵa qarsy jynystyq zorlyq jasaý derekteriniń artýyna baılanysty bul problemany Bas prokýratýra baqylaýǵa alypty.

Atap aıtqanda, balalarǵa jynystyq zorlyq-zombylyq jasaýǵa qarsy is-qımyl jasaý jónindegi zańdyq bazany jetildirýge aıryqsha nazar aýdaryldy. Bul iste pedofılderge qatysty qylmystyq jaýapkershilikti qatańdatý, balalarǵa zorlyq kórsetip sottalyp shyqqan adamdarǵa ákimshilik qadaǵalaýdy kúsheıtýdi qamtamasyz etý máseleleri de qamtylady.

«Taǵy bir jańalyq: buryn bala zorlap, sottalyp shyqqan adamdar belgili bir jerge kelip turaqtasa, jergilikti turǵyndardy óz aralaryna turýǵa kimniń kelgendigi týraly mindetti túrde habardar etý máselesi pysyqtalmaq!

Bas prokýror mundaı qylmyskerlerge kesilgen jazany jeńildetýdiń shartty túrde merziminen buryn bosatý, shartty túrde sottaý, raqymshylyq jasaý, jeńil jazaǵa aýystyrý, t.b. sııaqty qandaıda bir sharalaryn engizýge tyıym salýdy usyndy. Bul sanattaǵy qylmystardy tergeýdiń tıimdiligin arttyrý maqsatynda kúdiktiden jaýap alǵan kezde polıgrafologııalyq zertteýdi paıdalanýdy zańmen bekitý usynyldy», - delingen maqalada.

Bas prokýrordyń málimetinshe, bıyl­ǵy jyly arly-uıatty adamdar atynyń ózi­nen júregi aınıtyn mundaı aıýandyq qylmystar kúrt artty: bes aıdyń qory­tyn­dysy boıynsha, pedofılder tarapy­nan balalarǵa jasalǵan jynystyq qyl­mystardyń tek tirkelgen derekteriniń sany endigi 632-ge jetken.

Otandyq avtokólik óndirisin damytý maqsatynda úkimet ekinshi deńgeıli bank arqyly halyqqa nesıe bergeni belgili. Endi munyń qorytyndysy qandaı? «Shyn máninde, halyq nesıemen avtokólik aldy ma? dep saýal tastaıdy "Aıqyn" gazeti "2886 adam kólik aldy" atty maqalada.

Derekke júginer bolsaq, Qazaq­stannyń Damý bankiniń jeńildikti avto nesıe berý baǵdarlamasynyń aıasynda 2886 qazaqstandyq kólikti bolǵan. Bank olardyń kólik alýyna 9,2 mlrd teńge kóleminde qarajatty nesıe retinde bergen.

Qazaqstan Damý bankiniń tur­ǵyn­darǵa avto nesıeni ekinshi deń­geıli bankter arqyly beretini bel­gili. Atalǵan baǵdarlamaǵa «Bank TsentrKredıt» AQ, «Eýrazııalyq bank» AQ, «Halyq Banki» AQ, «Sber­bank Rossıı» AQ EB, «ATF Bank» AQ, Forte Bank AQ qa­tysýda. Jyl basynan beri olardyń barlyǵyna 2900-deı ótinim kelip túsken. Solardyń 2886-sy ǵana búgingi kúni kólikti bolyp otyr. Qazirgi tańda 9 adamnyń suranymy qaralý ústinde.

Aıta keteıik, Qazaqstan azamat­taryna avto nesıe berý sharttary jeńildetilgen túrde berilip jatyr. Nesıeniń syıaqy jyldyq mól­sher­lemesi 4 paıyzdy quraıdy, al óteý merzimi 5 jylǵa deıin.

Nesıege beriletin avtokólik­terdiń túri qazir 55 bolyp tur.

***

«Álemdik jáne dástúrli dinder lıderleri V seziniń keshegi jalpy otyrysy men jabylý saltanatyna El­basy Nursultan Nazar­baev qatysty», dep habarlaıdy « Egemen Qazaqstan » basylymy « Taǵattylyq - adamzat tańdaýy » atty maqalasynda.

Memleket basshysy Álemdik jáne dástúrli dinder lıderleriniń V sezi jahandyq únqatysýdyń ózektiligin, onyń qajettiligi arta túskenin taǵy da aıqyn kórsetip bergenin aıtty. «Sóz ben til, ıaǵnı tildesý men únqatysý - adam balasyna, adam­zatqa berilgen Qudaıdyń teńdessiz syıy. Bizdiń paryzymyz - onyń bitimgershilik jáne jasampaz qýa­tyn tolyǵymen paıdalaný. Búgingi V sezde jalpyǵa ortaq tatý­lyq pen meıirim, ádilettilik pen rýhanı úılesim dáýirine qaraı taǵy bir qadam jasaldy. Biz ja­handy kúmán-kúdik jaılaǵan kezeńde tek bir-birimizben tildesý arqyly ǵana úmitti, bolashaqqa degen se­nimdi oıatýǵa bolatynyn dá­leldedik», - dedi Qazaqstan Prezıdenti. Budan bólek, Nursultan Na­zarbaev sezdiń qyzmetine qatysty usynystaryn aıtty.

«Qazirdiń ózinde sezimizdiń baı tarıhy qalyptasyp úlgerdi. Biz betpe-bet suhbat qurý jóninde eleýli tájirıbe jınaqtadyq, suhbattasý men ózara túsinisý dástúrlerin ornyqtyrdyq. Dinder men órkenıetterdiń ózge de ózara yqpaldasý uıymdarymen baılanys jolǵa qoıylyp keledi. Son­dyqtan men Astanadaǵy osy­naý ǵımaratta Beıbitshilik jáne kelisim mýzeıin ashýdy usy­namyn. Sezimizdiń tarıhyna degen mundaı ıgi kózqaras, adamzattyń damý problemalary jónindegi birlesken sheshimder tájirıbesin jınaqtap, qorytý dinder men halyq­tardyń tatýlyǵy men ózara túsi­nistigin nyǵaıtý úshin asa mańyz­dy bolmaq. Beıbitshilik jáne kelisim mýzeıi, sondaı-aq, din­der men mádenıetter únqaty­sýy tarıhyn zertteıtin sezd janyndaǵy ǵylymı mekeme bolady», - dedi Memleket basshysy.