Pedagogqa eń basty keregi – tynymsyz izdenis pen talmas talap – aqmolalyq muǵalim
Almash Qulmaǵambetova - jastaıynan ádebıet pen ónerge sýsap, qazaqy tárbıe kórgen bilimdi de bilikti, jańashyl ustaz. Kóp balaly qarapaıym otbasynda dúnıege kelgen. Bala jasynan qazaqtyń folklorlyq ádebıetin boıyna sińirip ósken Almash Tólegenqyzy mektep bitirgen sátte qazaq tili men ádebıeti muǵalimi mamandyǵyn tańdap, Sh.Ýálıhanov atyndaǵy Kókshetaý memlekettik ýnıversıtetinde bilim alyp shyǵady. Osy kúni Stepnogor qalasyndaǵy №3 arnaıy mektep-ınternatyna qazaq tili men ádebıetiniń muǵalimi, defektolog bolyp jumys isteıdi.
«Ustazǵa eń basty keregi – tynymsyz izdenis pen talmas talap. Básekege qabiletti urpaq tárbıeleý úshin ustazǵa úlken jaýapkershilik júktelip otyr. Jaýapty jumys bolǵan soń men de bilim baǵdarlamasyna saı ár sabaqta qazirgi zamańǵy bilim berýdiń ozyq tehnologııasyn qoldanýǵa tyrysamyn», – deıdi keıipkerimiz.
Kez-kelgen adamǵa ustaz bolý baqyty buıyrmaıtyny anyq. Bul tek jany jaqsylyqqa qushtar, oqý-bilimge yntyzar, júregi izgilik pen mahabbatqa toly adamdardyń ǵana qolynan keletin is. Biraq, kez-kelgen ustaz bala júreginiń tórine shyǵa almaýy da múmkin. Osy rette, únemi oqýshylarynyń qazaq tili men ádebıeti pánine degen qyzyǵýshylyǵyn arttyryp, júregine jol taba bilgen Almash Tólegenqyzynyń da shákirtteri bıik belesterdi baǵyndyryp keledi.
«Jyl saıyn memlekettik merekeler qarsańynda mektep-ınternattyń ustazdary men oqýshylaryn qatystyryp, ulttyq salt-dástúrdi
nasıhattaıtyn, belgili bir taqyryptaǵy beınerolıkter túsiremiz. Sońǵy ret Ulystyń uly kúnine oraı ótken baıqaýda balany besikke bóleý jáne syrǵa taǵý tárizdi halqymyzdyń dástúrin usynǵan edik. Ondaǵy maqsat, balaǵa Naýryz meıramynyń qandaı mereke ekendigin túsindirip, ultymyzdyń salt-dástúrlerin nasıhattaý edi. Osy baıqaýǵa belsene qatysqan oqýshym Aqbota Qabıtova arnaıy dıplomǵa ıe boldy», – deıdi Almash Qulmaǵambetova.
Sonymen birge, ustazdyq jolynda on jylǵa jýyq tájirıbesi bar pedagog jaqynda respýblıkalyq «Órleý» portalynyń uıymdastyrýymen ótken onlaın baıqaýǵa qatysyp, kásibı biliktiligi men sheberligin kórsetkeni úshin «Úzdik avtor» tósbelgisi jáne Qurmet gramotasymen marapattaldy.
Ustaz izdengish bolýy, qandaı isti bolsyn, bar yntasymen atqara bilýi kerek. Osy rette, shákirtterin bilim nárimen sýsyndatyp júrgen Almash Tólegenqyzy mamandyǵyn dál tańdaǵan eken dersiz. Áriptesteri de onyń shyǵarmashylyq izdengishtigi men jańashyldyǵyna rızashylyqtaryn bildirýde.