Pedagogıkalyq bilim berýge jańa betburys jasalady – QyzPÝ rektory

ALMATY. QazAqparat - Búgin Memleket basshysy Qasym-Jomart Toqaev Parlament Májilisiniń jalpy otyrysynda eldegi saıası jáne áleýmettik-ekonomıkalyq salalardaǵy ózekti máselelerdi sheshý boıynsha birqatar mańyzdy mindetterdi atady. Sonyń ishinde Prezıdent usynǵan muǵalim tapshy óńirlerdiń máselesin sheshýdiń jańa tásili qazaqstandyq pedagogıkalyq qaýymdastyqtyń kóńilinen shyqty. Bul týraly Qazaq ulttyq qyzdar pedagogıkalyq ýnıversıtetiniń basqarma tóraǵasy, rektor Gúlmıra Qanaı aıtty, dep habarlaıdy QazAqparat.

«Sońǵy jyldary elimizdiń orta bilim berý salasynda eleýli reformalar qolǵa alynyp, ol júıeli túrde iske asýda. Olardyń ishinde baǵalaý júıesi, jańartylǵan bilim berý baǵdarlamasy, pedagogıkalyq tásilder jańartyldy. Sonymen qatar, ınklıýzıvti bilim berýdiń jańa saıasaty qoldanysqa engizildi. Al «Pedagog mártebesi týraly» zań muǵalim mamandyǵynyń qoǵamdaǵy bedeliniń artýyna jáne olardyń eńbekaqysynyń ósýine edáýir yqpal etkenin bilemiz. Osy úrdisterdiń jalǵasy retinde búgin Memleket basshysy muǵalimder jetispeıtin óńirler úshin tıisti qoldaý sharalary kesheni men aımaqtarǵa úzdik muǵalimderdi tartý boıynsha arnaıy baǵdarlama ázirleýdi tapsyrdy. Bul – pedagogıkalyq bilim berýge jańa betburys jasaıtynyna kámil senimdimiz», – dep atap ótti Gúlmıra Qanaı.

Onyń aıtýynsha, adamı kapıtaldyń sapasyn arttyrý – qoǵam damýyn qamtamasyz etýdiń basty tetigi.

Al qoǵamnyń zııatkerlik áleýetin ilgeriletýdi júzege asyrý pedagogterge tikeleı baılanysty.

«Otandyq pedagogıkalyq joǵary oqý oryndary talantty muǵalimderdi daıarlaýdy odan ármen jańa deńgeıge kótere túsý qajet dep oılaımyn. Bul turǵyda bolashaq mamandardyń sapasyna jete mán bergen durys. Ýnıversıtet ujymy Memleket basshysy atap ótken mindetterdi saralap, tyń oılary men ıdeıalaryn júzege asyrýǵa nıetti. Bul tarapta arnaıy keshendi josparlar da qabyldanatyn bolady. Bul sharalar Prezıdent usynǵan baǵdarlamanyń sátti júzege asýyna, elimizdegi muǵalim tapshylyǵyn joıýǵa ózindik yqpalyn tıgizetinine senimdimiz», – dedi rektor.