Pedagog mártebesi týraly zań jobasyn iske asyrýǵa 2020 jyly 390 mlrd teńge bólinedi

NUR-SULTAN. QazAqparat – Qarjy mınıstriniń birinshi orynbasary Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblıkalyq bıýdjet jobasyn tanystyrdy, dep habarlaıdy QazAqparat tilshisi.

«Bilim jáne ǵylym júıesin damytýǵa 2020-2022 jyldarǵa arnalǵan bıýdjet jobasynda 3,7 trln teńge, onyń ishinde 2020 jylǵa 858,5 mlrd teńge bólý kózdelgen. Tuńǵysh Prezıdent tapsyrmasyn iske asyrý maqsatynda «Pedagog mártebesi týraly» zań jobasy ázirlengenin bilesizder. Ony iske asyrýǵa bıýdjetten 2,2 trln teńge, onyń ishinde 2020 jylǵa – 389,8 mlrd teńge bólý kózdelgen. Atalǵan shyǵyndardyń kóleminde pedagogtardyń jalaqysyn kóterý týraly 2019 jylǵy 2 qyrkúıektegi Prezıdent joldaýynda bergen tapsyrmasyn oryndaýǵa arnalǵan shyǵystar eskerildi», - dedi Berik Sholpanqulov.

Vıtse-mınıstrdiń aıtýynsha, Prezıdent úsh aýysymdy mektep máselesin sheshý jáne 2022 jyldyń sońyna deıin apatty mektepterdi joıý mindetin alǵa qoıyp otyr.

«Osy maqsatqa 286,8 mlrd teńge somasynda shyǵyn shyǵady. Onyń ishinde 2020 jyly 87,1 mlrd teńge jergilikti bıýdjetter bazasyna berildi», - dedi ol.