Pedagog daıarlaý: bıyl «Altyn belgi» ıegerlerine 1,7 myńnan astam grant berildi

<p>ASTANA. KAZINFORM &ndash; &nbsp;Daryndy jastar arasynan pedagogıkalyq baǵyttarǵa túsýshilerdiń oń dınamıkasy baıqalyp otyr. 2024 jyly &laquo;Altyn belgi&raquo; tósbelgisiniń ıegerlerine 1,7 myńnan astam grant berildi. Bul týraly Úkimettiń baspasóz qyzmeti málim etti.&nbsp;</p>

Búgingi tańda 54 JOO-nyń pedagogıkalyq baǵyt boıynsha lıtsenzııasy bar. Pedagogıkalyq mamandyqtarǵa túsetin talapkerlerge qoıylatyn talaptar kezeń-kezeńimen artyp keledi. 

Osy jyly pedagogıkalyq baǵdarlamalarǵa túsetinderdiń UBT-daǵy ortasha baly 105 baldy qurady (2023 jyly — 102,5). Jyl saıyn pedagogıkalyq baǵyttarǵa granttar sany artyp keledi. Eger 2023-2024 oqý jylynda 15 923 grant bólinse, 2024-2025 oqý jylynda — 15 973 grant berildi.

Pedagogıkalyq joǵary oqý oryndary bilim berý baǵdarlamalaryn jańartý boıynsha jumysty jalǵastyrýda. Bilim berý baǵdarlamalarynyń tizilimine 1,7 myńnan astam baǵdarlama engizildi, onyń 89,7%-y «Pedagog» kásibı standarty negizinde jańartyldy.

Dúnıejúzilik banktiń «Orta bilim berýdi jańǵyrtý» jobasy aıaqtaldy. Joba aıasynda 30 ınnovatsııalyq bilim berý baǵdarlamasy ázirlendi.

Sonymen qatar ADOS-2 aýtızmdi erte dıagnostıkalaý ádistemesi jáne erekshe bilim berý qajettilikteri bar balalardy túzetý boıynsha 67 oqytýshy qosymsha oqytyldy. Búgingi tańda «Arnaıy pedagogıka» baǵyty boıynsha kadr daıarlaýdy júzege asyratyn 14 JOO ınklıýzıvti bilim berý kabınetterimen jaraqtandyrylǵan. Braılmen basyp shyǵarýǵa arnalǵan prınterler satyp alyndy. Pedagogıkalyq bilim berý tujyrymdamasy qabyldandy.

«Bolashaq» baǵdarlamasy aıasynda álemniń úzdik joǵary oqý oryndarynda 12,6 myńnan astam adam, onyń ishinde «Ǵylymı-pedagogıkalyq qyzmetkerler» sanaty boıynsha — 1,9 myńnan astam adam daıarlandy.

Buǵan deıin habarlanǵandaı, elimizdiń 4 joǵary oqý ornynda «Etnosaıası saýattylyq» páni engizildi.