Paıdaly qazbalardy zańsyz óndirýge baılanysty talaptar kúsheıtilmek

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy Parlament Májilisi depýtattarynyń bastamasy boıynsha qabyldanǵan zańdardy, Memleket basshysynyń Joldaýda bergen tapsyrmalaryn iske asyrý úshin ázirlendi. Birqatar quqyq buzýshylyq quramy boıynsha azamattar men zańdy tulǵalardyń quqyqtary men zańdy múddelerin qorǵaý maqsatynda kináli tulǵalardy jaýapqa tartý tártibin reglamentteý jónindegi mańyzdy mindetti sheshedi.

«Tekserýlerdi, sondaı-aq baqylaý men qadaǵalaýdyń ózge de nysandaryn zańsyz júrgizý faktileri boıynsha memlekettik organdardyń laýazymdy adamdarynyń jaýaptylyǵyn kúsheıtý maqsatynda olardy ákimshilik jaýaptylyqqa tartý merzimin bir jylǵa deıin ulǵaıtý usynyldy. Qazir bul merzim eki aıdy quraıdy. Tájirıbe kórsetip otyrǵandaı, bul da jazanyń bultartpastyǵy qaǵıdatyn eleýli túrde joıady. Mundaǵy másele – tekserý nátıjelerine, memlekettik qyzmetkerlerdiń áreketterine shaǵymdaný protsesiniń uzaq ýaqytty alýy bolyp otyr. Nátıjesinde, eki aılyq merzimniń ótýine baılanysty kináli sheneýnikter jazalanbaı qalýda», - dep túsindirdi depýtat Gúlnar Bıjanova.

Budan bólek G. Bıjanova qaýipti óndiristik obektilerge zańsyz kirýge jáne quramynda altyn bar kenderdi zańsyz óndirýge baılanysty problemalar uzaq ýaqyt boıy oryn alyp otyrǵanyn atap ótti.

«Memleket pen bıznestiń ekonomıkasy zardap shegip, adamdardyń ómiri men densaýlyǵyna zııan kelýde. Bul kúzetiletin obektige zańsyz kirgeni úshin qylmystyq jaýaptylyq engizýge bastama jasaýy úshin negiz boldy. Osyǵan baılanysty Kodekstiń 506-nshy babynyń dıspozıtsııasyna ákimshilik jáne qylmystyq jaýaptylyq ara-jigin ajyratý úshin naqtylaý engiziledi», - dedi depýtat.

Sonymen qatar, joba gazdy alaý etip jáne statsıonarlyq kózderde zańsyz jaqqany úshin ekologııalyq aıyppuldy esepteýge birdeı bazany qoldaný týraly túzetýdi kózdeıdi. Bul ekologııalyq aıyppuldardy esepteý kezinde kemsitýshilik tásildi bolǵyzbaıdy. El Prezıdentiniń aıyppuldy esepteý kezinde osyndaı tásildi joıý týraly qoıǵan mindeti sheshiledi.

Budan buryn habarlanǵandaı, qujat aıasynda prokýrordyń qaýlysyn oryndamaǵany úshin jaýapkershilik belgilenedi.