Paıdaly qazbalar qory ósti – Ekologııa mınıstrligi

NUR-SULTAN. QazAqparat – Geologııalyq barlaý aıasynda 2020 jyly alǵash ret memlekettik balansqa 20 ken orny qoıyldy. Bul týraly Ekologııa, geologııa jáne tabıǵı resýrstar mınıstrliginiń alqa májilisinde osy vedomstvonyń vıtse-mınıstri Serikqalı Brekeshev málim etti, dep habarlaıdy QazAqparat tilshisi.

«Jer qoınaýyn paıdalanýshylardyń geologııalyq barlaý jumystarynyń nátıjesinde 2020 jyly alǵash ret memlekettik balansqa 20 ken orny qoıyldy. Sonyń ishinde qatty paıdaly qazbalar – 9, kómirsýtek shıkizaty – 6, jer asty sýlary – 5», - dedi vıtse-mınıstr.

Ol 2020 jyly paıdaly qazbalar qorynyń óskenin málim etti. Atap aıtqanda, 111,5 tonna altyn, 55,4 myń tonna ýran, 13,8 mln tonna temir keni jáne 31,7 mln tonna munaı.

«Jer qoınaýyn jáne jer qoınaýyn paıdalaný týraly» Kodeksti iske asyrý úshin jer qoınaýyn geologııalyq zertteýge 22 lıtsenzııa, sondaı-aq jer qoınaýy keńestigin paıdalanýǵa eki lıtsenzııa berildi», - dedi S. Brekeshev.

Onyń aıtýynsha, jer qoınaýynyń memlekettik qoryn basqarý baǵdarlamasyn qalyptastyrý boıynsha josparly jumystar júzege asyryldy. Qatty paıdaly qazbalardy, keń taralǵan qazbalardy jáne kómirsýtek shıkizatyn barlaýǵa ári óndirýge 597 nysan engizilgen.